ఇంకొక్కడు.. ఇంకో వారం కావాలట

చియాన్ విక్రమ్ అంటేనే పర్ఫెక్షన్ కి మరో పేరు అన్నట్లుగా తయారైపోయాడు. సౌతిండియా మొత్తం మీద ఓ కేరక్టర్ కోసం మరీ ఈ రేంజ్ లో తపించిపోయే నటుడు మరొకడు కనిపించడు. ఇలాంటి విక్రమ్ ఇప్పుడు ''ఇంకొక్కడు'' అంటూ ఆడియన్స్ ముందుకు రాబోతున్నాడు. అయితే ''జనతా గ్యారేజ్‌'' సినిమాకు పోటీగా ఈ సినిమా సెప్టెంబర్ 1న రాబోతోంది అనేది ఇప్పటివరకు ఉన్న టాక్. కాని ఇప్పుడు సీన్ మారింది.

విక్రమ్ డబుల్ యాక్షన్లో.. నయనతార హీరోయిన్ గా నటించిన ఈ సినిమాపై చాలానే కళ్లు ఉన్నాయి. తెలుగు తమిళ భాషల్లో ఒకేసారి ఈ చిత్రం రూపొందినా.. డబ్బింగ్ కోసం ఒరిజినల్ వాయిస్ హోల్డర్స్ ని ఎవరూ సంప్రదించలేదంటే.. ఏ స్థాయి వరకూ ట్రై చేయబోతున్నారో అర్ధమవుతూనే ఉంది. అయితే ఈ సినిమాకు ఇప్పుడు కొత్తగా ఇంకో చిక్కొచ్చిపడింది. సినిమాలో అనుకున్న గ్రాఫిక్స్ ఒక్కటి కూడా పూర్తవ్వలేదు. అందుకే ఇప్పుడు సినిమాను 1వ తారీఖున రిలీజ్ చేయడం కష్టం అంటున్నారు. ఒక వారం గ్యాపిచ్చి సెప్టెంబర్ 9న రిలీజ్ చేస్తారట.

ఆల్రెడీ ట్రైలర్ కు మాంచి పేరు రావడం.. విక్రమ్ చేసిన హిజ్రా పాత్రకు అందరూ ఫిదా అయిపోవడం.. నయనతార హెలెనా సాంగులో చూపించిన గ్లామర్ రసవత్తరంగా ఉండటం.. నిత్యామీనన్ రోల్ కూడా బాగుండటం.. అద్భుతమైన యాక్షన్ ఎలిమెంట్స్.. వగైరా వగైరా సినిమా మీద ఎక్స్ పెక్టేషన్లు పెంచేశాయి. అందుకే ఇప్పుడు సినిమాను లేటుగా తెచ్చినా పెద్దగా నష్టం ఏమీ లేదు అనుకుంటున్నారులే.