విక్రమ్.. ఏదో సెన్సేషన్ లాగే ఉందే

గత రెండు మూడు రోజులుగా విక్రమ్ గురించి సౌత్ ఇండియన్ మూవీ సర్కిల్స్ లో ఓ వార్త హల్ చల్ చేస్తోంది. తన కొత్త సినిమాలో విక్రమ్ రెండు భిన్నమైన పాత్రలు చేస్తున్నాడని.. అందులో ఒకటి విలన్ పాత్ర అని, పైగా అది హిజ్రా క్యారెక్టర్ అని వార్తలొచ్చాయి. ఐతే ఇందులో వాస్తవమెంతో కానీ.. ఆ సినిమాకు సంబంధించిన ఫస్ట్ లుక్ పోస్టర్ మాత్రం స్టన్నింగ్ అనే చెప్పాలి. ఆదివారం అర్ధరాత్రి దాటాక ఈ లుక్ రిలీజ్ చేసింది చిత్ర యూనిట్. ఇప్పటిదాకా ఈ చిత్రానికి ‘మర్మ మనిదన్’ అనే వర్కింగ్ టైటిల్ అనుకుంటూ వచ్చారు. ఐతే ఫస్ట్ లుక్ లో ‘ఇరు ముగన్’ అనే టైటిల్ ప్రకటించారు. ఈ పోస్టర్ సినిమా మీద విపరీతమైన ఆసక్తి రేపేలా ఉంది.

చాలా డిఫరెంటుగా అనిపిస్తున్న ఈ పోస్టర్.. సినిమా మీద అయితే ఎలాంటి ఐడియా ఇవ్వట్లేదు. ఓవైపు విక్రమ్ ముఖం సగం మామూలుగా, ఇంకో సగం వ్యోమగామి తరహాలో కనిపిస్తోంది. మొత్తానికి ఇదేదో సైన్స్ ఫిక్షన్ కావచ్చేమో అన్న అభిప్రాయం కలుగుతోంది. వరుసగా ప్రయోగాలు చేసి ఎదురు దెబ్బలు తింటున్నప్పటికీ విక్రమ్ ఏమాత్రం వెనుకంజ వేయట్లేదని ఈ లుక్ ను బట్టి తెలుస్తోంది. ఈ చిత్రంలో విక్రమ్ సరసన నయనతార, నిత్యామీనన్ కథానాయికలుగా నటిస్తుండటం విశేషం. తెలుగులోకి ‘డైనమైట్’ పేరుతో రీమేక్ అయిన ‘అరిమానంబి’తో దర్శకుడిగా పరిచయమైన ఆనంద్ శంకర్ ఈ చిత్రాన్ని రూపొందిస్తున్నాడు. ఈ ఏడాది వేసవికి ‘ఇరు ముగన్’ ప్రేక్షకుల ముందుకు రానుంది. దీన్ని తెలుగులో కూడా విడుదల చేయబోతున్నారు.