విక్రమ్ ‘24’ సినిమాలో నటించి ఉంటే..

తెలుగులో ‘ఇష్క్’.. ‘మనం’ లాంటి సినిమాలతో చాలా మంచి పేరు సంపాదించాడు దర్శకుడు విక్రమ్ కుమార్. ఈ రెండు సినిమాల తర్వాత టాలీవుడ్ నుంచి బ్రేక్ తీసుకుని.. తమిళ స్టార్ హీరో సూర్యతో అతను తీసిన సినిమా ‘24’. ఈ సినిమాకు కూడా విమర్శకుల ప్రశంసలు లభించాయి. వసూళ్లు ఆశించినంత స్థాయిలో లేకపోయినా ఇది కూడా విక్రమ్ కెరీర్లో ఒక ప్రత్యేకమైన సినిమాగా నిలిచిపోయింది. ఐతే ఈ చిత్రాన్ని నిజానికి సూర్యతో తీయాలనుకోలేదట విక్రమ్. మరో తమిళ స్టార్ విక్రమ్ హీరోగా ‘ఇష్క్’ కంటే ముందే ఈ చిత్రం తీయాలని అనుకున్నాడట. అందుకు సన్నాహాలు కూడా జరిగాయట. కానీ అనివార్య కారణాల వల్ల అప్పుడది సాధ్యం కాక చివరికి సూర్యతో ఈ చిత్రం సెట్టయిందని అతను చెప్పాడు.

‘24’ సినిమాను పదేళ్ల కిందట విక్రమ్ హీరోగా త్రీడీలో తీయడానికి సన్నాహాలు జరిగినట్లు విక్రమ్ కుమార్ చెప్పాడు. నాలుగైదు రోజులు షూటింగ్ కూడా చేశాక ఈ సినిమా ఆగిపోయిందట. అదే సమయంలో నితిన్ తో ‘ఇష్క్’ మొదలుపెట్టే అవకాశం రావడంతో ఈ సినిమా మీదికి వచ్చేసినట్లు విక్రమ్ తెలిపాడు. ఇక ‘మనం’ తర్వాత సూర్య తనతో సినిమా చేయడానికి ఆసక్తి చూపించాడని.. ‘మనం’నే రీమేక్ చేద్దామని అతనన్నాడని.. కానీ తాను ‘24’ కథ వినమని చెప్పానని.. ఆ కథ నచ్చి స్వయంగా ఈ చిత్రాన్ని తనే ప్రొడ్యూస్ చేస్తూ నటించాడని విక్రమ్ కుమార్ వెల్లడించాడు. ‘24’ సినిమాలో హీరోగా.. విలన్ గా అద్భుత అభినయం ప్రదర్శించాడు సూర్య. ఐతే విక్రమ్ సూర్య కన్నా గొప్ప నటుడు. మరి ఆ సినిమాలో విక్రమ్ నటించి ఉంటే ఎలా ఉండేదో ఒకసారి ఊహించుకోండి.