న్యాచురల్ స్టార్ తో క్లాసీ డైరెక్టర్

ఈ ఏడాది న్యాచురల్ స్టార్ నానికి అంతగా అచ్చిబాటు రాలేదు. కృష్ణార్జున యుద్ధం ప్లాప్ కాగా దేవదాస్ సైతం సోసోగానే ఆడింది. ఇక బిగ్ బాస్ యాంకరింగ్ మళ్ళి ఇప్పట్లో టీవీ షోల గురించి ఆలోచించకూడదు అనేలా చేసింది. ప్రస్తుతం మళ్ళి రావా ఫేం గౌతమ్ తిన్ననూరి దర్శకత్వంలో జెర్సీ చేస్తున్న నాని పూర్తి ఫోకస్ దాని మీదే పెట్టాడు. రెగ్యులర్ షూటింగ్ హడావిడి లేకుండా సాగిపోతోంది. దీని తర్వాత ఏ మూవీ అనే దాని మీద అభిమానులు చాలా రోజుల నుంచే వెయిట్ చేస్తున్నారు.తమిళ సూపర్ హిట్ 96 రీమేక్ నాని చేయొచ్చనే వార్తలు వచ్చిన నేపథ్యంలో దాన్ని చూసిన వాళ్ళు కూడా లేకపోలేదు.

కానీ నాని మాత్రం వేరే రూట్ లో వెళ్తున్నాడు. విక్రమ్ కుమార్ దర్శకత్వంలో చేయడానికి నాని గ్రీన్ సిగ్నల్ ఇచ్చినట్టు ఫ్రెష్ అప్ డేట్. మైత్రి మూవీ మేకర్స్ బ్యానర్ లో ఇది ఉండబోతున్నట్టు తెలిసింది. ఈ ఇద్దరికీ గతంలోనే అడ్వాన్స్ ఇచ్చిన మైత్రి నిర్మాతలు ఇప్పుడు సరైన కథ దొరకడంతో సెట్స్ పైకి తీసుకెళ్తున్నారు. దీనికి సంబంధించిన అధికారిక ప్రకటన ఈ రెండు మూడు రోజుల్లో ఎప్పుడైనా రావొచ్చు. ఆ మేరకు చర్చలు జరిపి కలిసి తీయించుకున్న ఫోటో షూట్లు కూడా పూర్తయిపోయాయట.

మనం-24-ఇష్క్ లాంటి విభిన్నమైన సినిమాలతో పేరు తెచ్చుకున్న విక్రమ్ కుమార్ కాంబోలో నాని మూవీ అంటే ఖచ్చితంగా ఆసక్తి రేపేదే. హీరోయిన్ టెక్నీకల్ టీమ్ తదితర వివరాలు ఇంకా తెలియాల్సి ఉంది. మైత్రి సంస్థ ప్రస్తుతం విజయ్ దేవరకొండ డియర్ కామ్రేడ్ తో పాటు సాయి ధరమ్ తేజ చిత్రలహరి నిర్మాణంలో ఉంది. జెర్సీ షెడ్యూల్స్ ని బట్టి నానితో షూటింగ్ ని ప్లాన్ చేయబోతున్నారు.