బాలీవుడ్ లో గోపీచంద్ మూవీ

ప్రస్తుతం బయోపిక్ ల సీజన్ బాగానే నడుస్తోంది. బాలీవుడ్ లో అయితే.. జీవిత చరిత్రలు వరుసగా వచ్చేస్తున్నాయి. పీరియాడిక్ థీమ్ తీసుకుని.. చకచకా సినిమాలు లాగించేసి.. టకటకా విడుదల చేసేసి.. ఎడాపెడా హిట్స్ కొట్టేస్తున్నారు మేకర్స్. ఇప్పుడు బ్యాడ్మింటన్ ఛాంపియన్ కం కోచ్ అయిన పుల్లెల గోపీచంద్ జీవితంపై ఓ సినిమా తీసేందుకు ప్రయత్నాలు ప్రారంభయ్యాయి.

ఎయిర్ లిఫ్ట్.. బేబీ వంటి చిత్రాలను తెరకెక్కించిన బాలీవుడ్ నిర్మాత విక్రమ్ మల్హోత్రా.. పుల్లెల గోపీచంద్ పై బయోపిక్ తీసేందుకు సిద్ధమవుతున్నారు. హిందీతో పాటు.. తెలుగులో కూడా ఏకకాలంలో ఈ సినిమాను విడుదల చేసేందుకు సన్నాహాలు జరుగుతన్నాయి. ప్రస్తుతం గోపీచంద్ పాత్రను పోషించే నటుని కోసం అన్వేషణ జరుగుతోంది. అలాగే.. ఈ ప్రతిష్టాత్మక చిత్రాన్ని పర్ఫెక్ట్ గా హ్యాండిల్ చేయగల దర్శకుడి కోసం కూడా వేటాడుతున్నారు. తన జీవితాన్ని సినిమాగా రూపొందించడంపై.. పుల్లెల గోపీచంద్ కూడా ఎంతో సంతోషం వ్యక్తం చేస్తున్నారు.

నిజానికి పుల్లెల గోపీచంద్ పై బయోపిక్ ప్రతిపాదన టాలీవుడ్ లో గతంలోనే వినిపించింది. సుధీర్ బాబు హీరోగా.. ప్రవీణ్ సత్తారు డైరెక్షన్ లో ఈ ప్రాజెక్టు పై మాటామంతీ జరిగింది కానీ.. తర్వాత ముందుకు కదల్లేదు. ఇక గోపీచంద్ దగ్గర శిక్షణ తీసుకున్న సైనా నెహ్వాల్.. పీవీ సింధుల బయోపిక్ లకు కూడా ఏర్పాట్లు జరుగుతుంటే.. అదే సమయంలో గురువు గారిపై కూడా సినిమా రూపొందుతుండడం విశేషం.

Like Us on Facebook : https://www.facebook.com/Tupakidotcom/