ఆ దర్శకుడిని లాక్కోవద్దంటున్న విక్రమ్

తన కొత్త సినిమా ‘ఇంకొక్కడు’ (తమిళంలో ఇరుముగన్) దర్శకుడు ఆనంద్ శంకర్ పై ప్రశంసల జల్లు కురిపించాడు విక్రమ్. ఈ సినిమా తెలుగు ఆడియో వేడుక సందర్భంగా విక్రమ్ మాట్లాడుతూ.. ‘‘ఇంకొక్కడు నా కెరీర్లో ప్రత్యేకంగా చెప్పుకోవాల్సిన సినిమా. నేను చేసిన బెస్ట్ క్యారెక్టర్లలో ఇది ఒకటిగా నిలుస్తుంది. ఆనంద్ శంకర్ గొప్ప ప్రతిభావంతుడు. నేను కోరుకునే ఎన్నో అంశాలతో ఈ సినిమా తీశాడు. ఆనంద్ కోసం తెలుగులోనూ కొందరు నిర్మాతలు ప్రయత్నిస్తున్నట్లు తెలిసింది. ఐతే నేను అతడితో ఇంకో రెండు మూడు సినిమాలు చేయాలనుకుంటున్నా. దయచేసి ఇక్కడి నిర్మాతలెవరూ అతడి కోసం ప్రయత్నించకండి ప్లీజ్’’ అన్నాడు విక్రమ్.

‘ఇంకొక్కడు’ విషయంలో నిర్మాత ఏమాత్రం రాజీ పడలేదని.. భారీ స్టార్ కాస్ట్ కోసం చాలా ఖర్చు పెట్టారని.. అలాగే సినిమాను కూడా భారీ స్థాయిలో తెరకెక్కించాడని విక్రమ్ చెప్పాడు. ‘ఇంకొక్కడు’ సినిమాను తెలుగులో రిలీజ్ చేస్తున్న కృష్ణారెడ్డి గురించి చెబుతూ.. ‘‘ఈ మధ్య నా భార్య తిరుమలకు వెళ్లింది. నేను లేకపోయినా సరే.. ఆమెకు అద్భుతమైన ఏర్పాట్లు చేశారు. ఎన్నోసార్లు తిరుమలకు వచ్చినా.. ఈసారి అయినట్లు ఎప్పుడూ దర్శనం కాలేదని మా ఆవిడ ఎంతో సంతోషించింది’’ అని విక్రమ్ చెప్పాడు. యాంకర్ సుమ మీద విక్రమ్ ప్రశంసలు కురిపించాడు. స్పాన్సర్ల పేర్లను కూడా ఎంతో ఆసక్తికరంగా చెప్పడం.. చక్కగా యాంకరింగ్ చేయడం సుమకే చెల్లిందని.. ఇలాంటి యాంకర్ ను తానెక్కడా చూడలేదని విక్రమ్ అన్నాడు. రచయిత విజయేంద్ర ప్రసాద్ అటు తమిళ ఆడియో వేడుకకు వచ్చి.. ఇటు తెలుగు పాటల కార్యక్రమానికీ విచ్చేసి తనను ఆశీర్వదించడం చాలా సంతోషంగా ఉందని విక్రమ్ చెప్పాడు.