వినాయక్.. మహేష్ కూడా ఫ్లాటైపోయారు

ఒక మంచి సినిమా వస్తే దానిపై సెలబ్రెటీలందరూ ప్రశంసలు కురిపించే మంచి సంప్రదాయం కనిపిస్తోంది ఈ మధ్య టాలీవుడ్లో. ఈ శుక్రవారం ప్రేక్షకుల ముందుకొచ్చిన ‘ఊపిరి’ గురించి కూడా సెలబ్రెటీలు అలాగే స్పందిస్తున్నారు. తెలుగు పరిశ్రమకు కొత్త ఊపిరినిచ్చేలా ఉన్న ఈ చిత్రంపై తొలి రోజు నుంచే ప్రశంసలు కురుస్తున్నాయి. రాజమౌళితో మొదలుపెట్టి ఎందరో ప్రముఖులు ఈ సినిమా మీద ప్రశంసల జల్లు కురిపించారు. తాజాగా మరో స్టార్ డైరెక్టర్ వి.వి.వినాయక్ సైతం ‘ఊపిరి’ని ప్రశంసిస్తూ ఓ ప్రెస్ నోట్ సైతం విడుదల చేశాడు. మరోవైపు సూపర్ స్టార్ మహేష్ బాబు సైతం ‘ఊపిరి’కి కాంప్లిమెంట్స్ ఇచ్చాడు.

‘‘ఊపిరి సినిమా చూశాను. ఎక్స్ ట్రార్డినరీగా ఉంది. ఒక విభిన్నమైన కథాంశంతో, కొత్త తరహా చిత్రాన్ని తీసిన వంశీపైడిపల్లిని మనస్ఫూర్తిగా అభినందిస్తున్నాను. నాగార్జున లాంటి పెద్ద హీరో ఇలాంటి డిఫరెంట్ రోల్ చేయడం చాలా గొప్ప విషయం. ఆయన అద్భుతంగా నటించారు. అలాగే కార్తీ - తమన్నా క్యారెక్టర్స్ కూడా బావున్నాయి. ‘ఊపిరి’ సినిమాతో తెలుగు సినిమాకు ఊపిరి పోసిన పీవీపీ గారికి, యూనిట్ సభ్యులందరికీ నా అభినందనలు. వంశీ పైడిపల్లి - అఖిల్ రెండో సినిమా చేస్తున్నారని తెలిసి చాలా హ్యపీగా ఫీలయ్యాను. వంశీ - అఖిల్ తో చేసే సినిమా డెఫనెట్ గా సూపర్ హిట్ అవుతుంది’’ అన్నాడు వినాయక్. ఇక మహేష్ బాబు.. ‘‘ఊపిరి సినిమాలో నటన - దర్శకత్వం రెండూ అద్భుతం. ఊపిరి ఔట్ స్టాండింగ్ ఫిల్మ్. అందరికీ అభినందనలు’’ అని ట్విట్ చేశాడు. ఇంకా ఎందరో సెలబ్రెటీలు ఈ సినిమా మీద ప్రశంసల జల్లు కురిపించారు.