బాలయ్య కోసం ఊరమాస్ స్టోరీ .. రంగంలోకి వినాయక్!

ప్రస్తుతం బాలకృష్ణ .. బోయపాటి దర్శకత్వంలో ఒక సినిమా చేస్తున్నాడు. యాక్షన్ ఎంటర్టైనర్ గా ఈ సినిమా రూపొందుతోంది. 'సింహా' .. 'లెజెండ్' వంటి బ్లాక్ బస్టర్ హిట్ల తరువాత వస్తున్న సినిమా కావడంతో, అందరిలోను అంచనాలు ఉన్నాయి. ఈ సినిమా తరువాత బాలకృష్ణ ఏ దర్శకుడితో సెట్స్ పైకి వెళతాడనే విషయంలో ఇంకా స్పష్టత రాలేదుగానీ, ఆ జాబితాలో చాలా మంది దర్శకుల పేర్లు వినిపిస్తున్నాయి. బి.గోపాల్ .. పూరి జగన్నాథ్ .. గోపీచంద్ మలినేని .. అనిల్ రావిపూడి పేర్లు ఆ జాబితాలో కనిపిస్తున్నాయి. తాజాగా తెరపైకి వీవీవినాయక్ పేరు వచ్చింది.

టాలీవుడ్ లో మాస్ ఆడియన్స్ పల్స్ తెలిసిన దర్శకుడిగా వినాయక్ కి మంచి పేరు ఉంది. మాస్ ప్రేక్షకులను నూటికి నూరు శాతం మెప్పించాలంటే ఆ కథలో ఎక్కడ ఏం పడాలో ఆయనకి బాగా తెలుసు. ఇంతకుముందు ఆయన చేసిన సినిమాల జాబితాను ఒకసారి పరిశీలిస్తే ఈ విషయం అర్థమవుతుంది. అలాంటి వినాయక్ .. బాలకృష్ణతో ఒక సినిమా చేయనున్నాడనే టాక్ ఫిల్మ్ నగర్లో కొన్ని రోజులుగా బలంగా వినిపిస్తోంది.

ఈ సినిమాను కథ .. మాటలను కోన వెంకట్ అందిస్తున్నట్టుగా చెబుతున్నారు. బాలయ్య కోసం కోన వెంకట్ ఒక ఊరమాస్ కథను వినిపించడం .. ఆయన గ్రీన్ సిగ్నల్ ఇవ్వడం జరిగిపోయాయని అంటున్నారు. దర్శకుడిగా వినాయక్ రంగంలోకి దిగుతున్నాడని చెబుతున్నారు. బాలకృష్ణ - వినాయక్ కాంబినేషన్లో గతంలో 'చెన్నకేశవరెడ్డి' వచ్చిన సంగతి తెలిసిందే. రెండేళ్లక్రితం ఈ కాంబినేషన్ మరోసారి సెట్ కావలసిందేగానీ కుదరలేదు. మళ్లీ ఇప్పుడు ఈ కాంబినేషన్ తెరపైకి వచ్చింది. వచ్చే ఏడాదిలో ఈ ప్రాజెక్టు పట్టాలెక్కనుందని అంటున్నారు. వాస్తవమెంతన్నది చూడాలి మరి.