వైరల్ పిక్: విశ్వామిత్రుడిగా ప్రభాస్..!

యంగ్ రెబల్ స్టార్ ప్రభాస్ ప్రస్తుతం వరుసగా పాన్ ఇండియా సినిమాలు చేస్తూ 'పాన్ ఇండియా సూపర్ స్టార్' గుర్తింపు తెచ్చుకోడానికి ట్రై చేస్తున్నాడు. 'బాహుబలి' సినిమాతో దేశవ్యాప్తంగా క్రేజ్ తెచ్చుకున్న ప్రభాస్.. దానిని నిలబెట్టుకుంటూ ముందుకు వెళ్తున్నాడు. ఈ క్రమంలో బాలీవుడ్ దర్శకుడు ఓం రౌత్ తో ''ఆదిపురుష్'' అనే సినిమా చేస్తున్నాడు. ఇందులో రాముడిగా ప్రభాస్ నటిస్తున్నాడు. శ్రీరామనవమి పర్వదినాన్ని పురస్కరించుకుని ఈ సినిమాలోని అవతారాన్ని పరిచయం చేస్తారని ప్రచారం జరుగుతోంది. రాముడి లుక్ వస్తుందో లేదో తెలియదు కానీ.. విశ్వామిత్రుడి గెటప్ లో ఉన్న ప్రభాస్ త్రో బ్యాక్ పిక్ ఒకటి నెట్టింట వైరల్ అవుతోంది.

ఇందులో ప్రభాస్ విశ్వామిత్రుడిగా మారిపోయి కనిపిస్తున్నాడు. అయితే మన డార్లింగ్ ఇంత వరకు ఆ పాత్రను ఏ సినిమాలో పోషించినట్లు లేదు.. మరి ఈ గెటప్ ఎందులోనిదీ అని అందరూ ఆలోచిస్తున్నారు. కాకపోతే ఇది సినిమా కోసం కాదని తెలుస్తోంది. 'యమదొంగ' చిత్రానికి దర్శకధీరుడు రాజమౌళి దర్శకత్వం వహించడమే కాకుండా నిర్మాతగా కూడా వ్యవహరించారు. దీని కోసం విశ్వామిత్ర క్రియేష‌న్స్ ప్రొడక్షన్ హౌస్ కూడా ఏర్పాటు చేసారు. దీనికి లోగోని డిజైన్ చేయించాలని ఆలోచించిన జక్కన్న.. బ్యానర్ పేరుకి తగ్గట్లు లోగోలో విశ్వామిత్రుడిని పెట్టాడు. అందుకోసం ప్రభాస్ అయితే కరెక్ట్ గా సెట్ అవుతాడని భావించి ఆయనతో ఫోటోషూట్ చేయించారు. అంటే విశ్వామిత్ర క్రియేషన్స్ లోగోలో ఉండేది ప్రభాస్ అన్నమాట. ఎందుకో రాజమౌళి ఈ బ్యానర్ లో 'యమదొంగ' తర్వాత మరో సినిమాని నిర్మించలేదు. అయితే ఇప్పుడు ప్రభాస్ త్రో బ్యాక్ పిక్ ని చూసిన ఫ్యాన్స్, సినిమాలో కూడా ట్రై చేస్తే బాగుంటుందని కామెంట్స్ చేస్తున్నారు.