వైరల్ వీడియో: అభిమాని పాదాలను తాకిన హృతిక్

ఇలాంటివి తెలుగు సినిమా ఆడియో ఫంక్ష‌న్లు స‌క్సెస్ మీట్ల‌లోనే చూశాం. కానీ ఇప్పుడు ఈ క‌ల్చ‌ర్ బాలీవుడ్ లోనూ క‌నిపిస్తోంది. అక్క‌డ ఇలాంటివి అరుదు. ఇంత‌కీ ఏం జ‌రిగింది? అంటే.. బాలీవుడ్ స్టార్ హీరో హృతిక్ రోషన్ కాళ్ల‌కు న‌మ‌స్క‌రించాడు ఓ వీరాభిమాని. ఆ వెంట‌నే అక్క‌డ ఒక షాకింగ్ రియాక్ష‌న్.. ఊహించ‌ని యాక్ట్.. హృతిక్ పాదాల‌ను అభిమాని తాకిన త‌క్ష‌ణ‌మే హృతిక్ కూడా త‌న అభిమాని పాదాల‌ను తాకుతూ న‌మ‌స్క‌రించాడు. యాధృచ్ఛికంగా అయినా .. కొంత ఫ‌న్నీగా అనిపించినా కానీ హృతిక్ పై అది మరింత గౌరవాన్ని పెంచింది.

మ‌రింత‌గా వివ‌రాల్లోకి వెళితే.. హృతిక్ ఇటీవల ఓ ప్రమోషనల్ ఈవెంట్ లో బిజీగా ఉన్నాడు. ఈ సందర్భంగా ఓ అభిమాని వేదికపైకి వచ్చి హృతిక్ పాదాలను తాకడంతో అహూతుల్లో క‌ర‌తాళ ధ్వ‌నులు హోరెత్తాయి. ఏ మాత్రం సమయం వృథా చేయకుండా హృతిక్ తన అభిమాని పాదాలను వెంట‌నే తాక‌డంతో గ్యాల‌రీలో ఫ్యాన్స్ గ‌గ్గోలు పెట్టారు. అనంతరం అభిమానిని కౌగిలించుకుని హృతిక్ త‌నతో సెల్ఫీ దిగారు. ఈ చిరస్మరణీయ క్షణం ఆ అభిమాని ఆనందంలో ఉబ్బిత‌బ్బిబ్బ‌య్యాడ‌నేది ప్ర‌త్యేకించి చెప్ప‌న‌వ‌స‌రం లేదు. ప్ర‌స్తుతం ఈ క్లిప్ సోషల్ మీడియాలో వైరల్ అవుతోంది. నెటిజన్లు హృతిక్ ప‌ర‌స్ప‌ర గౌర‌వ విధానాన్ని అభినందిస్తున్నారు. అతన్ని నిజమైన సూపర్ స్టార్ అని పిలుస్తున్నారు.

భారతీయ సినీప‌రిశ్ర‌మ‌లో హృతిక్ రోషన్ అంటే ఒక బ్రాండ్. అత‌డు త‌న పాత్ర‌లోకి ప‌ర‌కాయం చేసేందుకు ఎంత‌గా శ్ర‌మిస్తారో తెలిసిందే. గ్రీక్ గాడ్ రూపంతో మ‌న‌సుల్ని దోచేయ‌డం అత‌డికి మాత్ర‌మే చెల్లింది. హృతిక్ తాను ఎంచుకున్న ఏ పాత్ర విష‌యంలో అయినా ఎంతో జాగ్ర‌త్త ప‌రుడు.. పూర్తిగా శ్ర‌ద్ధ పెట్టి ప‌ని చేస్తాడు. అందుకు త‌గ్గ రిజ‌ల్ట్ కూడా తెర‌పై క‌నిపిస్తుంది. అత‌డు పాత్ర అవసరాన్ని బట్టి అద్భుతమైన శారీరక మార్పులను చూపించ‌డం త‌న ప్ర‌త్యేక‌త‌.

ఇటీవ‌ల `ఫైటర్` కోసం అత‌డు త‌న రూపాన్ని పూర్తిగా మార్చేశాడు. వార్ త‌ర్వాత ఈ చిత్రంలో అతడిని యాక్షన్ అవతార్ లో చూడ‌నున్నారు ఫ్యాన్స్. మారిన అత‌డి గెట‌ప్ తాజా ప్ర‌మోష‌న‌ల్ ఈవెంట్లో క‌నిపిస్తోంది. అయితే త‌న మేకోవ‌ర్ గురించి హృతిక్ మాట్లాడుతూ-``నా తదుపరి చిత్రం ఫైటర్ లో నా పాత్ర కోసం సిద్ధమ‌వుతున్నాను. ఇది నేను ఎల్లప్పుడూ అనుసరించే 12 వారాల పరివర్తన గురించి ... కాబట్టి న‌న్ను న‌వంబర్ 9న మ‌రోసారి చూడండి...నేను ప్రస్తుతం కనిపిస్తున్నదానికంటే సన్నగా క‌నిపిస్తాను..`` అని కూడా అన్నాడు.

హృతిక్ తన 12 వారాల పరివర్తన పాల‌సీ (శారీర‌క మార్పు) ని ఇటీవలే ప్రారంభించాడు. జిమ్ లో తీవ్రంగా శ్ర‌మిస్తున్నాడు. ఫైటర్ రూపాన్ని సాధించడానికి నవంబర్ 9ని తన గోల్ పోస్ట్ గా ప్ర‌క‌టించాడు. ఈ చిత్రంలో హృతిక్ స‌ర‌స‌న‌ దీపికా పదుకొనే క‌థానాయిక‌గా న‌టిస్తోంది.
అలాగే సైఫ్ అలీ ఖాన్‌తో కలిసి న‌టించిన విక్రమ్ వేద టీజర్ ఇటీవ‌లే విడుదలైంది. ఇందులో హృతిక్ లుక్ న‌ట‌న‌కు పేరొచ్చింది. త్వ‌ర‌లో ఈ మూవీ విడుద‌ల కానుంది.