టక్ జగదీష్ - లవ్ స్టోరీ బాటలో 'విరాటపర్వం'

రానా దగ్గుబాటి - సాయి పల్లవి జంటగా దర్శకుడు వేణు ఉడుగుల తెరకెక్కిస్తున్న సినిమా ''విరాట పర్వం''. 'నీది నాది ఒకే కథ' సినిమాతో దర్శకుడిగా గుర్తింపు తెచ్చుకున్న వేణు.. రెండో సినిమాకు 1990స్ నాటి నక్సలిజం బ్యాక్ డ్రాప్ ను ఎన్నుకున్నాడు. ఇందులో కామ్రేడ్ రవన్నగా రానా.. వెన్నెల గా సాయి పల్లవి నటించారు. ఇటీవల విడుదలైన ఈ సినిమా టీజర్ విశేష స్పందన తెచ్చుకుని అంచనాలు పెంచేసింది. సమ్మర్ కానుకగా ఏప్రిల్ 30న ఈ చిత్రాన్ని ప్రేక్షకుల ముందుకు తీసుకురావాలని మేకర్స్ ప్లాన్ చేసుకున్నారు. అయితే ఇప్పుడు తాజాగా 'విరాటపర్వం' విడుదల వాయిదా వేస్తున్నట్లు అధికారికంగా ప్రకటించారు.

దేశవ్యాప్తంగా కోవిడ్ -19 కేసులు పెరుగుతుండటంతో ప్రస్తుతానికి 'విరాటపర్వం' సినిమాని పోస్ట్ పోన్ చేయడానికి నిర్ణయించుకున్నామని మేకర్స్ తెలిపారు. పరిస్థితులు చక్కబడిన తర్వాత కొత్త రిలీజ్ డేట్ ని ప్రకటిస్తామని చెప్పారు. కరోనా నేపథ్యంలో ఇప్పటికే 'లవ్ స్టోరీ' 'తలైవి' 'టక్ జగదీష్' వంటి చిత్రాలను వాయిదా వేసిన సంగతి తెలిసిందే. ఇప్పుడు అదే బాటలో 'విరాటపర్వం' కూడా నడిచింది. కాగా, దగ్గుబాటి సురేష్ బాబు సమర్పణలో శ్రీలక్ష్మి వెంకటేశ్వర సినిమాస్ బ్యానర్ పై సుధాకర్ చెరుకూరి 'విరాటపర్వం' చిత్రాన్ని నిర్మిస్తున్నారు. ప్రియ‌మ‌ణి - నివేథా పేతురాజ్ - నందితా దాస్‌ - నవీన్ చంద్ర - ఈశ్వ‌రీరావు - జ‌రీనా వ‌హాబ్ - సాయిచంద్ - బెనర్జీ - రాహుల్ రామకృష్ణ - నాగినీడు తదితరులు ఇందులో కీలక పాత్రలు పోషించారు. సురేష్ బొబ్బిలి ఈ సినిమాకి సంగీతం సమకూర్చారు. డానీ సాంచెజ్‌ లోపెజ్ - దివాకర్ మణి సినిమాటోగ్రఫీ అందించగా.. శ్రీకర్ ప్రసాద్ ఎడిటింగ్ వర్క్ చేస్తున్నారు.