నందమూరి ఉయ్యాల జంపాల!

షార్ట్‌ ఫిల్మ్స్‌ తో దర్శకుడిగా మంచి పేరు దక్కించుకున్న విరించి వర్మ 'ఉయ్యాల జంపాల' చిత్రంతో వెండి తెరపై ఎంట్రీ ఇచ్చిన విషయం తెల్సిందే. మొదటి సినిమాతోనే విమర్శకుల ప్రశంసలు దక్కించుకోవడంతో పాటు - మంచి కలెక్షన్స్‌ కూడా రాబట్టాడు. అయితే రెండవ సినిమా 'మజ్ను' మాత్రం పెద్దగా ఆకట్టుకోలేక పోయింది. దాంతో కాస్త గ్యాప్‌ తీసుకుని తదుపరి చిత్రాన్ని చేసేందుకు సిద్దం అయ్యాడు. ఈయన మూడవ సినిమాను నందమూరి హీరో కళ్యాణ్‌ రామ్‌ తో చేసేందుకు సిద్దం అయినట్లుగా తెలుస్తోంది.

విరించి వర్మ దర్శకత్వంలో నందమూరి కళ్యాణ్‌ రామ్‌ ఒక సినిమాను చేయబోతున్నాడట. ఇటీవలే విరించి వర్మ చెప్పిన కథకు కళ్యాణ్‌ రామ్‌ గ్రీన్‌ సిగ్నల్‌ ఇచ్చాడని - త్వరలోనే సినిమాను పట్టాలెక్కించేందుకు ఏర్పాట్లు కూడా జరుగుతున్నట్లుగా తెలుస్తోంది. ఫ్యామిలీ ఎంటర్‌ టైన్‌ మెంట్‌ కథాంశంతో ఈ చిత్రాన్ని తెరకెక్కించబోతున్నట్లుగా సమాచారం అందుతోంది. ఇప్పటికే ఒప్పుకున్న సినిమాలను పూర్తి చేసిన తర్వాత కళ్యాణ్‌ రామ్‌ ఈ సినిమాను మొదలు పెట్టే అవకాశం ఉంది. త్వరలోనే కళ్యాణ్‌ రామ్‌ '118' చిత్రంతో ప్రేక్షకుల ముందుకు రాబోతున్నాడు. ఆ సినిమాలో కళ్యాణ్‌ రామ్‌ చాలా స్పెషల్‌ గా కనిపించబోతున్నాడు. విరించి వర్మ - కళ్యాణ్‌ రామ్‌ ల మూవీని సితార ఎంటర్‌ టైన్‌ మెంట్స్‌ బ్యానర్‌ లో రాధాకృష్ణ నిర్మించే అవకాశం ఉంది.