రెండోసారి మిల్కీ బ్యూటీతో నల్లనయ్య

కోలీవుడ్ లో హీరోగానే కాక పరిశ్రమ మనుగడ కోసం నడిగర్ సంఘంతో పాటు నిర్మాతల సమాఖ్యలో కీలక బాధ్యతలు వహిస్తున్న విశాల్ చాలా కాలం తర్వాత తెలుగులో అభిమన్యుడుతో ఈ ఏడాది తొలి హిట్ కొట్టాడు. బయ్యర్లు తమకు లాభం ఇచ్చిన విశాల్ సినిమా అని చెప్పుకుంది దీని గురించే. ఇటీవలే వచ్చిన పందెం కోడి 2 ఆశించిన స్థాయిలో స్పందన దక్కించుకోనప్పటికీ బిసి సెంటర్స్ లో పెట్టుబడిని వెనక్కు ఇచ్చింది. ఇప్పుడు విశాల్ అయోగ్య పేరుతో తమిళ్ లో రూపొందుతున్న టెంపర్ రీమేక్ లో నటిస్తున్న సంగతి తెలిసిందే. దీంట్లో రాశి ఖన్నా హీరోయిన్. ఇది రీమేక్ కాబట్టి తెలుగులో రాదనీ విశాల్ తేల్చేసాడు.

తాజాగా మరో ప్రాజెక్ట్ కు విశాల్ గ్రీన్ సిగ్నల్ ఇచ్చాడు. సుందర్ సి దర్శకత్వంలో రూపొందబోయే సినిమాలో మరోసారి మిల్కీ బ్యూటీ తమన్నాను జోడిగా ఎంచుకున్నాడు. ఈ ఇద్దరు గతంలో కత్తి సండైలో చేసారు. ఇది తెలుగులో డబ్ అయ్యింది కానీ ఫలితం నిరాశ కలిగించింది. ఇప్పుడు ఇది ఈ కాంబోలో రెండో సినిమా. సుందర్ సి విశాల్ తో ఇంతకు ముందు అంబాలా చేసాడు. అది ఇక్కడ మగమహారాజు పేరుతో వచ్చింది. మదగజరాజా అనే మరో ప్రాజెక్ట్ మధ్యలోనే ఆగిపోయింది. అది తిరిగి రీ స్టార్ట్ చేసే ఆలోచన ఇద్దరికీ లేదు.

సుందర్ సి ప్రస్తుతం అత్తారింటికి దారేది తమిళ్ రీమేక్ లో బిజీగా ఉన్నాడు. శింబు హీరోగా మేఘా ఆకాష్ క్యాథరిన్ హీరోయిన్లు నటిస్తున్న ఈ మూవీ షూటింగ్ ప్రస్తుతం జరుగుతోంది. విశాల్ టెంపర్ రీమేక్ సుందర్ ఈ అత్తారింటికి దారేది పూర్తి చేసుకున్నాక తమ కాంబో మూవీని స్టార్ట్ చేయబోతున్నారు. మొత్తానికి విశాల్ మళ్ళి స్పీడ్ పెంచాడు. టెంపర్ రీమేక్ మనం చూడలేకపోయినా సుందర్ సి సినిమా మాత్రం డబ్ అవుతుంది. కాకపోతే వచ్చే ఏడాది ద్వితీయార్థంలోనే వస్తుంది కాబట్టి అప్పటి దాకా విశాల్ తెలుగు ఫ్యాన్స్ కు సినిమా లేనట్టే.