కాలా పైరసీ.. విశాల్ మళ్లీ హీరో అయ్యాడు

పైరసీ అనేది సినిమాలకు అతి పెద్ద బెడదగా మారిపోయింది ఈ రోజుల్లో. తొలి షో పడ్డ కొన్ని గంటల్లోనే పైరసీ ప్రింట్ రెడీ అయిపోయి.. రాత్రికల్లా ఇంటర్నెట్లో అందుబాటులోకి వచ్చేస్తోంది. ఈ విషయంలో తమిళ సినిమాలకు మరీ పెద్ద తలనొప్పిగా తయారయ్యాయి పైరసీ వెబ్ సైట్లు. వాటి ఆట కట్టించడానికి నిర్మాతల మండలి అధ్యక్షుడు విశాల్ కొంత కాలంగా గట్టిగానే ప్రయత్నిస్తున్నాడు. పైరసీ సైట్లకు చాలా వరకు బాగానే అడ్డుకట్ట వేయగలిగాడు. అయినప్పటికీ పైరసీ భూతాన్ని పూర్తిగా అరికట్టలేకపోతున్నారు. ఇలాంటి టైంలో సూపర్ స్టార్ రజనీకాంత్ కొత్త సినిమా ‘కాలా’ ఈ రోజు ప్రేక్షకుల మందుకొస్తుండగా.. నిన్న రాత్రి ఎక్కడో ఫారిన్లో ప్రిమియర్ షో వేస్తే.. దాన్ని నేరుగా ఫేస్ బుక్‌లో లైవ్ స్ట్రీమ్ ఇచ్చేశాడు ఓ ప్రబుద్ధుడు. ఐతే దీన్ని విశాల్ చాలా సీరియస్‌గా తీసుకున్నాడు.

వెంటనే విశాల్ అండ్ టీం రంగంలోకి దిగింది. ఇక్కడి నుంచే యాంటీ పైరసీ సెల్.. సైబర్ క్రైమ్ పోలీసుల్ని అప్రమత్తం చేశారు. చకచకా చర్యలు చేపట్టి ఆ ఫేస్ బుక్ లైవ్ స్ట్రీమ్‌ ను ఆపించారు. అంతే కాదు.. లైవ్ స్ట్రీమ్ ఇచ్చిన వ్యక్తిని అరెస్టు కూడా చేయించారు. తెలుగువాడైన విశాల్‌కు వ్యతిరేకంగా తమిళ ఇండస్ట్రీకి చెందిన కొందరు పెద్దలు ఊరికే విమర్శలు చేస్తుంటారు. అతడిని ఇరుకున పెట్టే ప్రయత్నం చేస్తుంటారు. కానీ విశాల్ చేతల మనిషి అని పలుమార్లు రుజువైంది. ‘కాలా’ పైరసీ విషయంలో సత్వరం స్పందించి చర్యలు చేపట్టడం ద్వారా విశాల్ మరోసారి హీరో అయ్యాడు. అక్కడి మీడియా వాళ్లు విశాల్‌ను ఆకాశానికెత్తేస్తూ రాత్రి నుంచే ట్వీట్లు పెడుతున్నారు. అతడిని ‘మ్యాన్ ఆఫ్ యాక్షన్’ అంటూ కీర్తిస్తున్నారు. మరి ‘కాలా’ పైరసీని మున్ముందు విశాల్ ఎలా అడ్డుకుంటాడో చూడాలి.