ఆ ఇద్దరితో కంఫర్ట్ గా ఉంటుందట

ఒక తమిళ హీరోకి తెలుగులో క్రేజ్ ఉండటం అంత చిన్న విషయమేమీ కాదు. పందెం కోడి లాంటి మాస్ సినిమాలతో తెలుగు ప్రేక్షకుడికి దగ్గరైన విశాల్ సినిమా అనగానే సగటు తెలుగు ప్రేక్షకుడు ఆసక్తి ప్రదర్శిస్తుంటాడు. తాజాగా అతగాడి రాయుడు చిత్రం రానుంది. ఈ సినిమా ప్రమోషన్లో భాగంగా ఆయన ప్రత్యేక ఇంటర్వ్యూలు ఇస్తున్నారు. ఈ సందర్భంగా ఒక ప్రముఖ ఛానల్ తో మాట్లాడిన సందర్భంగా తన పక్కన నటించే హీరోయిన్ల గురించి ఆసక్తికర అంశాల్ని చెప్పుకొచ్చాడు. ఎత్తున్న హీరోయిన్లు కోరుకోవటం హీరోలకు అత్యాశే అవుతుందని చెప్పిన విశాల్.. హైట్ తక్కువగా ఉన్న అమ్మాయిలతో కలిసి యాక్ట్ చేసేటప్పుడు వచ్చే ఇబ్బందుల్ని చెప్పుకొచ్చాడు.

మాంచి హైట్ లో ఉండే విశాల్ పక్కన జోడి కట్టే హీరోయిన్ల సాదాసీదా ఎత్తు ఉంటే.. కెమేరా మెన్ కి చుక్కలేనట. తాను ఏ హీరోయిన్ తో యాక్ట్ చేసేందుకైనా రెఢీ అని కాకుంటే.. ఎత్తు తక్కువ హీరోయిన్స్ అయితే.. ఫ్రేం సెట్ చేసుకోలేక కెమేరా మెన్లు కిందామీదా పడిపోతారని చెప్పుకొచ్చారు. తన పక్కన నటించిన హీరోయిన్స్ లో శృతిహసన్.. రీమాసేన్ లు ఇద్దరూ హైట్ విషయంలో సరిగ్గా ఫిట్ అవుతారని.. వారితో కలిసి యాక్ట్ చేసేటప్పుడు ఫ్రేం సెట్ చేసుకోవటం చాలా సులువని చెప్పాడు.

హైట్ ఉన్న హీరోయిన్లతోనే నటించాలన్నది హీరోలకు అత్యాశే అవుతుందని చెప్పిన విశాల్..తన హైట్ కు తగ్గ హీరోయిన్లు దొరకటం లేదని చెప్పుకొచ్చారు. తన వరకు చూస్తే శృతిహసన్.. రీమాసేన్ లతో కలిసి నటించటం కంఫర్ట్ అని చెప్పుకొచ్చారు. విశాల్ చెప్పిన మాటల్నే తీసుకుంటే.. అతనికున్న హీరోయిన్ కష్టాలు ఒక ఎత్తు అయితే.. మన తెలుగు యువ హీరోలలో చాలామందితో జత కట్టే హీరోయిన్లతో.. సదరు యువ ‘బాబు’ల ఫ్రేం సెట్ చేసుకోవటానికి కెమేరామెన్లు ఎన్ని తిప్పలు పడుతున్నారో..?