సంక్రాంతి సినిమాల‌కు భ‌లే క‌లిసొచ్చింది

సంక్రాంతికి వ‌చ్చిన సినిమాల‌న్నీ పాజిటివ్ టాక్ తో న‌డుస్తున్న నేప‌థ్యంలో వాటి దారికి అడ్డు రాకూడ‌ద‌ని వేరే సినిమాల నిర్మాతలు నిర్ణ‌యించుకున్న‌ట్లున్నారు. ఈ శుక్ర‌వారం కొత్త‌గా ఏ సినిమా విడుదల కావ‌ట్లేదు. నందిని రెడ్డి-నాగ‌శౌర్య‌ల క‌ళ్యాణ వైభోగ‌మే సినిమా ఈ శుక్ర‌వారం రావాల్సింది. కానీ దాన్ని వాయిదా వేసేశారు. త‌ర్వాత విశాల్ డ‌బ్బింగ్ మూవీ క‌థ‌క‌ళి రేసులో నిలిచింది.

ఐతే ఈ ఉద‌యం వ‌ర‌కు రిలీజ్ ఖాయం అనుకున్న ఆ మూవీ కూడా అనూహ్యంగా వాయిదా ప‌డిపోయింది. సెన్సార్ సంబంధిత సమస్యలు తలెత్తి సినిమాను 22వ తేదీకి విడుదల చేయలేకపోతున్నట్లు ‘కథకళి’ టీమ్ నుంచి సమాచారం అందుతోంది.విడుద‌ల‌కు సిద్ధంగా ఉన్న మిగ‌తా చిన్న సినిమాల‌కు కూడా సంక్రాంతి సినిమాల‌కు పోటీ వెళ్ల‌డం ఎందుక‌ని త‌ర్వాతి వారానికి షెడ్యూల్ అయ్యాయి. దీంతో పొంగ‌ల్ మూవీస్ కు మ‌రో వారం క‌లెక్ష‌న్లు దంచుకునే అవ‌కాశం ద‌క్కింది.

సంక్రాంతి సినిమాల్లో డిక్టేట‌ర్ మిన‌హా మూడు సినిమాలూ బాగానే క‌లెక్ష‌న్లు రాబ‌డుతున్నాయి. రెండో వీకెండ్ వీటికి బాగా క‌లిసి రానుంది. ఇలా చిన్న స్థాయి కొత్త సినిమా సైతం లేకుండా వీకెండ్ గ‌డిచిపోవ‌డం అరుదు. త‌ర్వాతి శుక్ర‌వారం సీత‌మ్మ అందాలు రామ‌య్య సిత్రాలు, ల‌చ్చిందేవికి ఓ లెక్కుంది, క‌ళావ‌తి లాంటి సినిమాలు పోటీలో ఉన్నాయి.