రాణాని తెగ పొగిడేస్తున్న రాయుడు

కోలీవుడ్ స్టార్ హీరో విశాల్ నటించిన మరుదు చిత్రం.. తెలుగులో రాయుడు టైటిల్ పై విడుదలవుతోంది. ఈ నెల 27న రిలీజ్ కానున్న ఈ చిత్ర ఆడియో రిలీజ్ ఫంక్షన్ రీసెంట్ గా హైద్రాబాద్ లో జరిగింది. ఈ కార్యక్రమానికి దగ్గుబాటి రాణా చీఫ్ గెస్ట్ గా హాజరవగా.. ఈ ఈవెంట్ మొత్తంలో.. రాణాని విశాల్ ఆకాశానికి ఎత్తేయడమే స్పెషల్ గా నిలిచింది.

'రాణా నాకు చాలా మంచి స్నేహితుడు. చెన్నై వరదల సమయంలో నాకు ఓ ఫోన్ కాల్ వచ్చింది. 300 కుటుంబాలకు సహాయం కావాలని దాని సారాంశాం. ఈ విషయాన్ని రాణాకి చేరవేశాను. అంతే.. తెల్లారే సరికల్లా ట్రక్కులు చెన్నైలో ఉన్నాయి. ఆ తర్వాత తనే చొరవ తీసుకుని చాలా సహాయం చేశాడు. ఎన్ని వందల ట్రక్కులను పంపించారో తెలీదు కానీ.. వేలాది మందికి సాయం అందించాడు రాణా.' అంటూ రాణా మంచి మనసు గురించి చెప్పాడు విశాల్.

అలాగే నడిగర్ సంఘం ఆర్థిక ఇబ్బందుల నుంచి గట్టెక్కడానికి కూడా రాణా సహాయం చేశాడట. అప్పుల్లో ఉన్నప్పుడు ఓ క్రికెట్ మ్యాచ్ నిర్వహించాలనే ఆలోచన చెబితే.. తను ఆడ్డమే కాకుండా విక్టరీ వెంకటేష్ లాంటి ఇతరులను తీసుకొచ్చాడట. 'ఇప్పుడు సౌత్ ఇండియన్ ఆర్టిస్ట్స్ అసోసియేషన్ 9 కోట్ల బ్యాంక్ బ్యాలన్స్ తో ఉందంటే.. అందులో రాణా చొరవ కూడా ఉంది. కేవలం మెంబర్ షిప్ కోసమే 2 లక్షలు ఇచ్చేశాడు రాణా' అని చెప్పాడు విశాల్.