స్నీక్ పీక్ లో విశాల్ సినిమా చూపించాడుగా

`డిటెక్టీవ్‌` త‌రువాత విశాల్ హిట్ మాట విని చాలా కాల‌మ‌వుతోంది. నాలుగేళ్లుగా విశాల్ సూప‌ర్ హిట్ సినిమాని సొంతం చేసుకోవాల‌ని విశ్వ‌ప్ర‌య‌త్నాలు చేస్తూనే వున్నారు కానీ ఇంత వ‌ర‌కు ఆ స్థాయి విజ‌యాన్ని మాత్రం ద‌క్కించుకోలేక‌పోతున్నారు. పందెంకోడి-2, అయోగ్య‌, యాక్ష‌న్, చ‌క్ర‌, ఎనీమీ వంటి చిత్రాల‌తో స‌క్సెస్‌ని సొంతం చేసుకోవాల‌ని గ‌జినీ మొహ‌మ్మ‌ద్ లా దండ యాత్ర చేస్తున్నాడు. కానీ అనుకున్న హిట్ మాత్రం ప‌డ‌టం లేదు.

దీంతో ఈ సారి ఎలాగైనా సూప‌ర్ హిట్ ని ద‌క్కించుకోవాల‌ని విశాల్ చేస్తున్న చిత్రం `సామాన్యుడు`. త‌మిళంలో `వీర‌మాయే వాగై సూడుమ్‌` పేరుతో తు పా శ‌ర‌వ‌ణ‌న్ ద‌ర్శ‌క‌త్వం వ‌హించిన ఈ చిత్రాన్ని తెలుగులో `సామాన్యుడు` పేరుతో రిలీజ్ చేస్తున్నారు. `నాట్ ఏ కామ‌న్ మెన్` అనే క్యాప్ష‌న్ తో రిలీజ్ కాబోతున్న ఈ మూవీని ఫిబ్ర‌వ‌రి 4న ప్రేక్ష‌కుల ముందుకు తీసుకొస్తున్నారు.

డింపుల్ హ‌యాతీ హీరోయిన్ గా న‌టించిన ఈ చిత్రాన్ని విశాల్ న‌టించి నిర్మించారు. తెలుగు, త‌మిళ భాష‌ల్లోనూ ఏక కాలంలో విడుద‌ల కానుంది. ఈ చిత్రానికి సంబంధించిన స్నీక్ పీక్ ని మంగ‌ళ‌వారం చిత్ర బృందం విడుద‌ల చేసింది. 2.35 నిమిషాల నిడివిగ‌ల ఈ స్నీక్ పీక్ లో విశాల్ ఏకంగా ఓ కీల‌క యాక్ష‌న్ ఘ‌ట్టాన్ని చూపించారు. ఇలా ఓ సినిమా ఫైట్ ని పూర్తి స్థాయిలో ప్రేక్ష‌కుల‌కు చూపించ‌డం ఇదే తొలిసారి.

సినిమా మొత్తం ఫుల్ యాక్ష‌న్ మోడ్ లో వుండేలా క‌నిపిస్తోంది. తాజాగా రిలీజ్ చేసిన స్నీక్ పీక్ లో చూపించిన ఫైట్ లో బాటిల్స్ ప‌గ‌ల‌డంతో హీరో విశాల్ కు గాయ‌ల‌య్యాయి. కెవిన్ సినిమాటోగ్ర‌పీ, యువ‌న్ శంక‌ర్ రాజా సంగీతం ఈ చిత్రానికి ప్ర‌ధాన బ‌లంగా క‌నిపిస్తున్నాయి. యోగిబాబు, బాబురాజ్‌, జి. మ‌రిముత్తు, తుల‌సి ప్ర‌ధాన పాత్ర‌ల్లో న‌టించారు. ఈ మూవీ అయినా విశాల్ కు భారీ విజ‌యాన్ని అందిస్తుందేమో చూడాల‌ని అంటున్నారు. మ‌రి విశాల్ పెట్టుకున్న న‌మ్మ‌కాన్ని `సామాన్యుడు` ఎంత వ‌ర‌కు నిజం చేస్తుందో తెలియాలంటే ఫిబ్ర‌వ‌రి 4 వ‌ర‌కు వేచి చూడాల్సిందే.