'మోసగాళ్ళు' చిత్రానికి ఇతర భాషల్లో టైటిల్స్ ఖరారు చేసిన విష్ణు..!

మంచు విష్ణు హీరోగా నటిస్తున్న లేటెస్ట్ యాక్షన్ ఎంటర్టైనర్ ''మోసగాళ్ళు''. ఏవీఏ ఎంటర్‌టైన్మెంట్ మరియు 24 ఫ్రేమ్స్ ఫ్యాక్టరీ బ్యానర్లపై మంచు విష్ణు స్వయంగా ఈ సినిమాను నిర్మించారు. హాలీవుడ్ డైరెక్టర్ జెఫ్రీ గీ చిన్ ఈ చిత్రాన్ని తెరకెక్కించారు. ఇందులో విష్ణు సోదరిగా స్టార్ హీరోయిన్ కాజల్ అగర్వాల్ నటించగా.. పవర్ ఫుల్ పోలీస్ ఆఫీసర్ గా బాలీవుడ్ నటుడు సునీల్ శెట్టి నటించాడు. వాస్తవ ఘటనల ఆధారంగా ప్రపంచంలో జరిగిన అతిపెద్ద ఐటీ స్కామ్‌‌ ను ఈ చిత్రం ద్వారా వెండితెరపై ఆవిష్కరిస్తున్నారు. పాన్ ఇండియా స్థాయిలో ఈ చిత్రాన్ని తెలుగు తమిళం మలయాళం కన్నడ హిందీ భాషలలో విడుదల చేయనున్నారు.

ఈ నేపథ్యంలో ఇతర భాషల్లో 'మోసగాళ్ళు' చిత్రానికి సంబంధించిన టైటిల్స్ ని కాజల్ అగర్వాల్ సోషల్ మీడియా వేదికగా వెల్లడించారు. తమిళ్ - కన్నడ - హిందీ భాషల్లో ''అను అండ్ అర్జున్'' అనే టైటిల్ ని ఖరారు చేసారు. ఇక మలయాళంలో ''అర్జున్ అండ్ అను'' అనే టైటిల్ ని పెట్టారు. కాగా, ఈ చిత్రంలో రుహీ సింగ్ హీరోయిన్ గా నటించగా.. నవీన్ చంద్ర - నవదీప్ ఇతర ముఖ్య పాత్రలు పోషించారు. ఈ చిత్రానికి సామ్ సీఎస్ సంగీతం సమకూర్చగా.. షెల్డన్ చౌ సినిమాటోగ్రఫీ అందించారు. ఈ ఆక్టేన్ యాక్షన్ థ్రిల్లర్ ని భారీ బడ్జెట్‌ తో హై టెక్నికల్ వాల్యూస్‌ తో నిర్మించారు. ఇప్పటికే విడుదలైన టీజర్ - సాంగ్స్ - ట్రైలర్ మంచి రెస్పాన్స్ తెచ్చుకున్నాయి. 'మోసగాళ్ళు' చిత్రాన్ని మార్చి నెలలో ప్రేక్షకుల ముందుకు తీసుకురావడానికి సన్నాహాలు చేస్తున్నారు.