అంతటి దమ్మున్న హీరో టాలీవుడ్ లో అతడొక్కడేనా?

టాలీవుడ్ లో హీరోలకు కొదవ లేదు. కానీ.. వారందరిలో భిన్నంగా ఆలోచించే యువ హీరో శ్రీవిష్ణు అనటంలో సందేహం లేదు. ఒక్క ఛాన్సు అంటూ తిరిగే దర్శకులు చాలామంది కనిపిస్తారు. అలాంటి చాలామంది టాలెంటెడ్ అప్ కమింగ్ డైరెక్టర్ ను ఇండస్ట్రీలో తెగ వాడేస్తారు కానీ.. వారికి సరైన అవకాశం మాత్రం ఇవ్వరు.

అందుకు భిన్నంగా ఏ సినిమాకు ఆ సినిమాకు కొత్త దర్శకులకు అవకాశం ఇచ్చే హీరోలు చాలా చాలా తక్కువగా ఉంటారు. ఆ క్వాలిటీ శ్రీవిష్ణు దగ్గర పుష్కలంగా ఉంది. గడిచిన రెండేళ్లలో అతను హీరోగా తనకంటూ క్రేజ్ ను తెచ్చుకోవటంతోపాటు.. అతడి సినిమాలు అన్నంతనే మినిమం గ్యారెంటీ అన్న ఇమేజ్ ను సొంతం చేసుకున్నాడు.

ప్రతి సినిమాను కాస్తంత కొత్తగా ఉండేలా ప్లాన్ చేసే శ్రీవిష్ణు.. తాజాగా నటించిన చిత్రం అర్జున ఫల్గున.. ఈ ఏడాది చివరి రోజున విడుదలవుతున్న ఆరు సినిమాల్లో ఒకటి. పేరుకు ఆరు సినిమాలు రిలీజ్ అవుతున్నా.. అందరిని ఆకర్షిస్తున్నది మాత్రం ‘అర్జున ఫల్గున’ మాత్రమే. ఈ సినిమాకు దర్శకుడిగా తేజ మార్నిని పరిచయం చేస్తున్నాడు. ఈ మూవీని కేవలం 55 రోజుల్లో షూటింగ్ పూర్తి చేయటం ద్వారా తనకే షాకిచ్చాడని దర్శకుడి గురించి హీరో శ్రీవిష్ణు చెప్పటం తెలిసిందే.

ఇప్పటివరకు శ్రీవిష్ణు చేసిన పదిహేను సినిమాల్లో పది సినిమాలు కొత్త దర్శకులతో చేయటం చూస్తే.. అతడి ట్రాక్ రికార్డును బ్రేక్ చేయటం అంత ఈజీ కాదని చెప్పాలి. ఒకసారి విజయం సాధించిన తర్వాత.. ఆ విజయాన్ని కాపాడుకోవాలన్న జాగ్రత్తతో.. అతిగా ఆలోచించి.. కొత్త వారికి అవకాశం ఇవ్వటానికి సవాలక్ష ఆలోచించే సగటు టాలీవుడ్ హీరోలకు భిన్నంగా.. టాలెంట్ ఎక్కడున్నా సరే.. తాను ఎంకరేజ్ చేస్తాననే సత్తా శ్రీవిష్ణుకు మాత్రమే ఉందని చెప్పాలి. ఈ తరహా ‘హీరోయిజం’ చూపించే టాలీవుడ్ హీరోల్లో శ్రీవిష్ణుకు ప్రత్యేక స్థానం ఉందని చెప్పకతప్పదు.