బెంజ్ పై మాస్ కా దాస్ ద‌ర్జా

మాస్ కా దాస్ విశ్వ‌క్ సేన్ ఇటీవ‌ల ఓ టీవీ ఛాన‌ల్ వివాదంతో వార్త‌ల్లో నిలిచారు. త‌ను న‌టించిన తాజా చిత్రం `అశోక‌వ‌నంలో అర్జున క‌ల్యాణం`. విద్యాసాగ‌ర్ చింత ద‌ర్శ‌క‌త్వం వ‌హించిన ఈ చిత్ర ప్ర‌మోష‌న్స్ ని వెరైటీగా ప్లాన్ చేసిన హీరో విశ్వ‌క్ సేన్ ప్రాంగ్ వీడియోతో ప్ర‌చారం మొద‌లు పెట్టాడు. ఇదే ఆయ‌న‌ని వివాదంలో ఇరుక్కునేలా చేసింది. ఈ వీడియో వ‌ల్ల విశ్వ‌క్ సేన్ నెట్టింట వైర‌ల్ అయ్యాడు. ప్రాంక్ వీడియో కార‌ణంగా త‌ను అనుకున్న‌ట్టే భారీ ప‌బ్లిసిటీ ల‌భించింది.

అయితే స‌ద‌రు వీడియో కార‌ణంగా జ‌న జీవితం స్థంభించింద‌ని, విశ్వ‌క్ సేన్ కార‌ణంగా చాలా మంది సామాన్యులు తీవ్ర ట్రిఫిక్ స‌మ‌స్య‌ల్ని ఎదుర్కొన్నారంటూ ఓ ప్ర‌ముఖ వార్తా ఛాన‌ల్ ప్ర‌త్యేకంగా డిబేట్ ని ఏర్పాటు చేసింది.

ఇదే డిబేట్ కు హీరో విశ్వ‌క్ సేన్ ని కూడా పిలిచి అవ‌మానించ‌డంతో విశ్వ‌క్ సేన్ హాట్ టాపిక్ గా మారాడు. ఇదే ఊపులో త‌ను న‌టించిన `అశోక వ‌నంలో అర్జున క‌ల్యాణం` మంచి విజ‌యాన్ని సాధించి విశ్వ‌క్ సేన్ ను మ‌ళ్లీ ట్రాక్ లోకి తీసుకొచ్చింది.

ఈ సినిమా స‌క్సెస్ ని ఎంజాయ్ చేస్తున్న మాస్ కా దాస్ తాజాగా బుధ‌వారం మ‌ళ్లీ వార్త‌ల్లో నిలిచాడు. అత్యంత ఖ‌రీదైన బెంజ్ కార్ పై కూర్చుని ద‌ర్జాగా పోజులిస్తూ ఆ ఫొటోల‌ని అభిమానుల‌తో పంచుకున్నాడు. త‌న‌కు అత్యంత ఇష్ట‌మైన బెంజ్ జీ క్లాస్ 2022 మోడ‌ల్ టాప్ ఎండ్ కార్ ని విశ్వ‌క్ సొంతం చేసుకున్నాడు.

ఆ ఆనందాన్ని అభిమానుల‌తో పంచుకున్నాడు. `నా డ్రీమ్ కార్ ని నిన్న‌నే కొనుగోలు చేశాను. నాపై మీరు చూపిస్తున్న ప్రేమాభిమానాల వ‌ల్లే ఇది సాధ్య‌మైంది. నా జీవితంలో జ‌రుగుతున్న ప్ర‌తీ విష‌యానికి ఎంతో ఆనందంగా వున్నా` అని విశ్వ‌క్ సేన్ సోష‌ల్ మీడియా వేదిక‌గా వెల్ల‌డించారు.

విశ్వ‌క్ సేన్ సొంతం చేసుకున్న బెంజి మోడ‌ల్ కార్ రేటు గ‌రిష్టంగా 2.5 కోట్ల వ‌ర‌కు వుంటుంద‌ట‌. అయితే విశ్వ‌క్ తీసుకున్న కారు విలువ మాత్రం 1.5 కోట్ల పైమాటే అంటున్నారు. విశ్వ‌క్ సేన్ పోస్ట్ పై ద‌ర్శ‌కుడు త‌రుణ్ భాస్క‌ర్ ఫ‌న్నీగా స్పందించారు. `ఆ కారు నాదే. ఫొటోలు తీసుకుంటానంటే ఇచ్చా` అంటూ ఫ‌న్నీగా కామెంట్ చేశారు. ప్ర‌స్తుతం వీరిద్ద‌రి పోస్ట్ లు నెట్టింట వైర‌ల్ గా మారాయి.