మాస్ కా దాస్ ఈ సారి ధ‌మ్కీ ఇస్తున్నాడు

మాస్ కా దాస్ విశ్వ‌క్ సేన్ కొత్త త‌ర‌హా చిత్రాల‌కు నాంది ప‌లుకుతున్నారు. కెరీర్ ప్రారంభంలో `వెళ్లిపోమాకే` అంటూ ఆక‌ట్టుకన్న ఈ యంగ్ టాలెంటెడ్ హీరో కెరీర్ ప‌రంగా విభిన్న‌మైన చిత్రాల్లో న‌టిస్తూ ముందుకు సాగుతున్నాడు. ప్ర‌స్తుతం స‌రికొత్త నేప‌థ్యంలో విభిన్న‌మైన క‌థ‌, క‌థ‌నాల‌తో రూపొందుతున్న `అశోక‌వ‌నంలో అర్జున కల్యాణం` చిత్రంలో న‌టిస్తున్న విశ్వ‌క్‌సేన్ తాజా గా మ‌రో కొత్త త‌ర‌హా చిత్రానికి శ్రీ‌కారం చుట్టారు.

విశ్వ‌క్ సేన్ హీరోగా న‌టిస్తున్న తాజా చిత్రానికి `దాస్ కా ధ‌మ్కీ` అనే టైటిల్ ని ఫైన‌ల్ చేశారు. ఈ చిత్రం ద్వారా న‌రేష్ కుప్పిలి ద‌ర్శ‌కుడిగా ప‌రిచ‌యం అవుతున్నారు.

బుధ‌వారం టైటిల్ ని ప్ర‌క‌టిస్తూ చిత్ర బృందం టైటిల్ లోగోని విడుద‌ల చేసింది. వ‌న్మ‌యి క్రియేష‌న్స్, విశ్వ‌క్ సేన్ సినిమాస్ బ్యాన‌ర్ ల‌పై విశ్వ‌క్ సేన్ ఫాద‌ర్ క‌రాటే రాజు ఈ చిత్రాన్ని నిర్మిస్తున్నారు. నివేదా పేతురాజ్ అ చిత్రంలో విశ్వ‌క్ సేన్ కు జోడీగా న‌టిస్తోంది. గ‌తంలో వీరిద్ద‌రు క‌లిసి `పాగ‌ల్‌` మూవీలో న‌టించారు. ఇది వీరిద్ద‌రి కాంబినేష‌న్ లో రానున్న రెండ‌వ సినిమా. సూప‌ర్ హిట్ చిత్రాల‌కు క‌థ‌, మాట‌లు అందిస్తున్న ప్ర‌స‌న్న‌కుమార్ బెజ‌వాడ ఈ చిత్రానికి క‌థ‌, మాట‌లు అందిస్తున్నారు.

యునిక్ స్టోరీతో సాగే కామెడీ థ్రిల్ల‌ర్ ఇది. టైటిల్ పోస్ట‌ర్ లో ప్లేయింగ్ కార్డ్స్ .. మ‌ధ్య‌లో కారికేచ‌ర్‌..వెయిట‌ర్ యూనిఫామ్ లో క‌నిపిస్తున్న జోక‌ర్ పిక్ క‌నిపిస్తున్న తీరు ఆస‌క్తిని రేకెత్తిస్తోంది. స‌రికొత్త క‌థ‌తో థ్రిల్లింగ్ ఎలిమెంట్స్ తో రూపొందుతున్నీ మూవీ ఈ బుధ‌వారం హైద‌రాబాద్ లోని రామారాయుడు స్టూడియోస్ లో లాంఛ‌నంగా మొద‌లైంది. ప‌క్కా స్క్రిప్ట్ తో విభిన్న‌మైన స్టోరీతో రూపొంద‌నున్న ఈమూవీ రెగ్యుల‌ర్ షూటింగ్ ఈ నెల 14 నుంచి ప్రారంభం కాబోతోంది.

స్క్రిప్ట్ ని ప‌క్కాగా రెడీ చేసుకున్న ద‌ర్శ‌కుడు న‌రేష్ కుప్పిలి ఈ మూవీపై పూర్తి అవ‌గాహ‌న‌తో వున్నార‌ట‌. ఈ సారి ఎలాగైన విశ్వ‌క్‌సేన్‌కి ఈ మూవీతో మాసీవ్ హిట్ ని అందించాల‌నే ప‌ట్టుద‌ల‌తో దర్శ‌కుడు వున్న‌ట్టుగా చెబుతున్నారు. దినేష్ కె. బాబు కెమెరా, లియోన్ జేమ్స్ సంగీతం, అన్వ‌ర్ అలీ ఎడిటింగ్‌, ఆర్ట్ రామాంజ‌నేయులు అందిస్తున్నారు.

దాస్ కా ధ‌మ్కీ అంటూ ఈ సారి విశ్వ‌క్ సేన్ ఏ రేంజ్ లో ధ‌మ్కీ ఇస్తాడో తెలియాలంటే ఈ మూవీ రిలీజ్ వ‌ర‌కు వేచి చూడాల్సిందే.