అభిమానానికి పరిక్ష పెట్టిన విశ్వాసం!

స్టార్ హీరోలకు డై హార్డ్ ఫ్యాన్స్ ఉంటారు. వాళ్ళ అభిమానం ఏ రేంజ్ లో ఉంటుందో మనందరికీ తెలిసిన విషయమే.. అందులోనూ కొలీవుడ్ స్టార్ హీరోల అభిమానం కాస్త 'పిచ్చి' అనే స్థాయి లో ఉంటుంది. అక్కడ 'తల' అజిత్ కు భారీ సంఖ్యలో అభిమానులు ఉన్నారు. అనిరుద్ ట్యూన్ లో 'ఆలుమా డోలుమా ఇసాలంగడి మాలుమా' అంటూ డ్యాన్స్ వేస్తే టోటల్ తమిళ్ నాడు షేక్ అయింది. మరి అలాంటి అజిత్ కొత్త సినిమా ఫస్ట్ లుక్ రిలీజ్ అయితే ఫ్యాన్స్ కు పూనకం రావడం ఖాయం. కానీ ఈసారి వాళ్ళ అభిమానానికి అజిత్ కొత్త సినిమా ఫస్ట్ లుక్ రూపంలో ఒక పరిక్ష ఎదురైంది.

సోషల్ మీడియాలో అజిత్ అభిమానులకు.. విజయ్ అభిమానులకు మధ్య భారీ పోటీ ఉంటుంది. ట్విట్టర్ లో ట్రెండింగ్ చేయడం.. యూ ట్యూబ్ లో వ్యూస్ రికార్డులు సాధించడంలో అభిమానులు ఒకరితో ఒకరు ఒకరకంగా యుద్ధం చెస్తారు. కానీ ఈసారి అజిత్ అభిమానులకు వచ్చిన సమస్య ఏంటంటే... అజిత్ తాజా చిత్రం 'విశ్వాసం' ఫస్ట్ లుక్ ను తెల్లవారు ఝామున 3.40 గంటలకు రిలీజ్ చేయడం. మరి ఆ టైంలో రిలీజ్ చేస్తే ఫ్యాన్స్ అందరూ మేలుకొని మరీ ట్రెండింగ్ లోకి తీసుకురావాలి. ఎంత కష్టమో చెప్పండి! పొద్దున్నేలేచి మరీ ఆ పనిని విజయవంతంగా పూర్తి చేశారు.

ఇక ఈ 'విశ్వాసం' డైరెక్టర్ శివ. ఇప్పటికే వీళ్ళిద్దరి కాంబినేషన్ లో 'వీరమ్'.. 'వేదాళం'.. 'వివేగం' అంటూ మూడు సినిమాలు వచ్చాయి. మొదటి రెండో సూపర్ డూపర్ హిట్లు. మొదట్లో మనం 'ఆలుమా డోలుమా' అనుకున్నాము కదా ఆ పాట 'వేదాళం' సినిమాలోనిదే. ఇక ఈ 'విశ్వాసం' అజిత్ - శివ కాంబినేషన్ లో రానున్న నాలుగో సినిమా. అంతకంటే ఇంట్రెస్టింగ్ పాయింట్ ఏంటంటే.. ఈ అజిత్ ఈ డైరెక్టర్ శివ డైరెక్షన్లో వరసగా సినిమాలు చేయడం. ఇలా అజిత్ లాంటి హీరోతో వరసగా నాలుగు సినిమాలు చేసే అవకాశం అంటే అది మామూలు విషయం కాదు. ఈ 'విశ్వాసం' పై అభిమానుల్లో, ట్రేడ్ వర్గాల్లో భారీ అంచనాలు ఉన్నాయి. ఇక అభిమానుల విశ్వాసానికి టెస్ట్ పెట్టిన ఫస్ట్ లుక్ ను మీరు ఓ లుక్కేయండి.