సత్య హీరోగా 'వివాహ భోజ‌నంబు'.. వినోదాల విందుగా టీజర్..!

యువ హీరో సందీప్ కిషన్ హీరోగా నటిస్తూనే నిర్మాతగా మారి సినిమాలు చేస్తున్న సంగతి తెలిసిందే. ఇటీవల ఓ స్టార్ కమెడియన్ హీరోగా పరిచయం చేస్తూ తన బ్యానర్ లో ''వివాహ భోజ‌నంబు'' అనే క్యాచీ టైటిల్ తో సినిమా ప్రకటించాడు. హీరో ఎవరో రివీల్ చేయకుండా మీరే గెస్‌ చేయండి అంటూ సినిమాపై ఆసక్తిని పెంచే ప్రయత్నం చేశారు. తాజాగా ఈ చిత్ర హీరోని పరిచయం చేయడమే కాకుండా.. సినిమా టీజర్‌ ను కూడా విడుదల చేశారు. స్టార్ కమెడియన్ సత్య హీరోగా 'వివాహ భోజనంబు' తో ఎంట్రీ ఇస్తున్నారు. ఇందులో అర్జావీ రాజ్ హీరోయిన్ గా నటిస్తోంది. కొన్ని యదార్థ సంఘటనల ఆధారంగా దర్శకుడు రామ్ అబ్బరాజు ఈ చిత్రాన్ని తెరకెక్కిస్తున్నారు. వెంకటాద్రి టాకీస్ సమర్పణలో ఆనంది ఆర్ట్స్ మరియు సోల్జర్స్ ఫ్యాక్టరీ బ్యానర్స్ పై కె.ఎస్. శినీష్ - సందీప్ కిషన్ ఈ చిత్రాన్ని నిర్మించారు. తాజాగా విడుదలైన టీజర్ ఫన్నీగా ఉండటంతో పాటు అందరినీ విశేషంగా ఆకట్టుకుంటోంది.

'వివాహ భోజనంబు' టీజర్ చూస్తుంటే ఇది కరోనా నేపథ్యంలో పెళ్లి చేసుకున్న ఓ యువకుడి కథతో రూపొందిన కామెడీ ఎంటర్టైనర్ అని అర్థమవుతోంది.ప ది రూపాయలు పార్కింగ్ టికెట్ కొనడానికి, ఫ్రెండ్స్ కి బర్త్ డే పార్టీ ఇవ్వడానికి ఇష్టపడని ఓ పిసినారి మహేష్ పాత్రలో సత్య కనిపిస్తున్నాడు. కరోనా లాక్‌ డౌన్ రావడంతో 30మందితో పెళ్లి చేసుకున్న సత్య.. లాక్‌ డౌన్ పొడిగించడంతో ఎన్ని కష్టాలు పడ్డాడనే నేపథ్యంలో ఈ సినిమా ఉంటుందని టీజర్ చూస్తే తెలుస్తోంది. శానిటైజర్ లో నీళ్లు కలుపుతూ.. కరోనా కూడా ఒక జీవే కదా.. జీవ హింస పాపమని అలా చేస్తున్నానని సత్య తెలివిగా చెప్పే డైలాగ్ నవ్వు తెప్పిస్తోంది. చివర్లో నెల్లూరు ప్రభ అనే ప్రత్యేక పాత్రలో సందీప్ కిషన్ కనిపించి సర్ప్రైజ్ ఇచ్చాడు. ఇందులో శ్రీకాంత్ అయ్యంగార్ - సుదర్శన్ - వైవా హర్ష ఇతర పాత్రల్లో కనిపిస్తున్నారు. మొత్తం మీద ఈ సినిమాలో వినోదాల విందుకు ఏమాత్రం లోటు లేదని తెలుస్తోంది.