`ఫ్యామిలీ మ్యాన్` అంత స‌క్సెస‌వుతుందా?

తెలుగు కుర్రాళ్లు రాజ్ అండ్ డీకే తెర‌కెక్కించిన ఫ్యామిలీమ్యాన్ సిరీస్ ఎంత‌టి సంచ‌ల‌నం సృష్టించిందో తెలిసిందే. ఆ త‌ర్వాత టెర్ర‌రిజం నేప‌థ్యంలోనే స్పెషల్ ఓపీఎస్ సిరీస్ అంతే పెద్ద స‌క్సెసైంది. మునుముందు రాజ్ అండ్ డీకే ర‌క‌ర‌కాల ప్ర‌ణాళిక‌ల‌తో సిద్ధంగా ఉన్నారు.

అయితే ఇంత‌లోనే కాప్ యాక్ష‌న్ సిరీస్ `ఇండియన్ పోలీస్ ఫోర్స్‌` అంటూ రోహిత్ శెట్టి హంగామా మొద‌లైంది. కాప్ స్టోరీల‌కు రోహిత్ శెట్టి పెట్టింది పేరు. అందుకే అత‌డి నుంచి ఈ ప్ర‌క‌ట‌న వెలువ‌డ‌గానే దేశం మొత్తం అటువైపు చూసింది. ఇక ఈ కాప్ సిరీస్ లో సిద్ధార్థ్ మల్హోత్రా - శిల్పాశెట్టి లాంటి స్టార్లు న‌టిస్తుంటే ఆస‌క్తి మ‌రింత పెరిగింది.

తాజాగా వివేక్ ఒబెరాయ్ ఈ సిరీస్ లో చేర‌డం ఆస‌క్తిని పెంచుతోంది. ఒబేరాయ్ కి మెగా డిజిటల్ సిరీస్ ఇది. ఇండియన్ పోలీస్ ఫోర్స్ లో రోహిత్ శెట్టి టీమ్ లోకి ప్రవేశించనున్నాడని ప్ర‌క‌టించారు. రోహిత్ శెట్టి  -ప్రైమ్ వీడియో కాంబినేష‌న్ లో యాక్షన్ సిరీస్ ప్రస్తుతం చిత్రీకరణలో ఉంది.

వివేక్ ఫస్ట్ లుక్ ను సోషల్ మీడియాలో షేర్ చేస్తూ ``ఉత్తమ దళం.. ఇండియన్ పోలీస్ ఫోర్స్ లో చేరి రోహిత్ శెట్టి కాప్ యూనివర్స్ లో సూపర్ కాప్ గా మారడానికి ఛార్జ్ ఇచ్చేశారు. ఈ అద్భుతమైన పాత్రకు నన్ను విశ్వసించినందుకు ధన్యవాదాలు బ్రో @itsrohitshetty ! నా ఇతర ఇద్దరు సూపర్ కాప్స్ అద్భుతమైన @సిద్మల్హోత్రా .. ఒకే ఒక్క శిల్పాశెట్టి.. ఖాకీలో హీరోయిజంతో కిక్కాస్ యాక్షన్ ని ఇష్టపడ‌తాను! అని వివేక్ ఒబెరాయ్ ప్ర‌క‌టించారు.

ఈ సిరీస్ అమెజాన్ ప్రైమ్ వీడియోలో స్ట్రీమింగ్ అవుతుంది. ఇది ఎనిమిది-ఎపిసోడ్ ల‌ ఆర్క్ ను కలిగి ఉంటుంది. ఈ సిరీస్ కి రోహిత్ శెట్టి  అతని చీఫ్ అసిస్టెంట్ డైరెక్టర్ సుశ్వంత్ ప్రకాష్ సంయుక్తంగా దర్శకత్వం వహించనున్నారు. ప్రస్తుతం ఈ సిరీస్ షూటింగ్ ముంబైలో జరుగుతోంది. భారీ కాస్టింగ్ తో శెట్టి ప్ర‌యోగం బాగానే ఉంది కానీ .. ఫ్యామిలీ మ్యాన్ సిరీస్ లా స‌త్తా చాటుతుందా? అన్న‌దే వేచి చూడాలి. పోలీస్ స్టోరీస్ లోనూ తీవ్ర‌వాద నేప‌థ్యం త‌ర‌హాలోనే ఎమోష‌న్స్ కి కొద‌వేమీ ఉండ‌దు. వాటిని ర‌గిలించ‌డంలో శెట్టి స‌క్సెస‌వుతాడేమో చూడాలి.