రెండేళ్లు వెయిట్ చేశా ఇలాంటి స్క్రిప్ట్ కోసం!

టాలీవుడ్ హీరో నితిన్ గతేడాది భీష్మా విజయం తర్వాత ఈ ఏడాది చెక్ సినిమాతో ప్రేక్షకుల ముందుకు రాబోతున్నాడు. ఫిబ్రవరి 26న చెక్ సినిమా విడుదల అవుతుంది. టాలెంటెడ్ డైరెక్టర్ చంద్రశేఖర్ ఏలేటి దర్శకత్వం వహించగా వి.ఆనంద్ ప్రసాద్ సినిమాను నిర్మించారు. ఈ సినిమాలో నితిన్ సరసన ప్రియాప్రకాష్ హీరోయిన్ గా నటించగా.. రకుల్ ప్రీత్ సింగ్ కీలకపాత్రలో కనిపించనుంది. అయితే ఈ సినిమా ఫస్ట్ లుక్ నుండి కూడా ప్రేక్షకులలో ఆసక్తిరేపింది. ముఖ్యంగా టీజర్, ట్రైలర్స్ తో సినిమా పై జనాలలో ఖచ్చితంగా ఏదో కొత్తదనం చూపిస్తారనే ఆశాభావం కలిగించింది. అయితే విడుదలకు దగ్గర పడటంతో చిత్రబృందం ప్రచార కార్యక్రమాలను గ్యాప్ లేకుండా నిర్వహిస్తున్నారు. తాజాగా ఓ ఇంటర్వ్యూలో పాల్గొన్న హీరో, హీరోయిన్ ఇతరులు సినిమా గురించి పలు కీలక విషయాలను బయటపెట్టారు.

హీరో నితిన్ మాట్లాడుతూ.. 'రెండేళ్లుగా సరైన స్క్రిప్ట్ కోసం ఎదురుచూస్తున్నాను. మధ్యలో చాలా కథలు విన్నాను. కానీ ఓరోజు డైరెక్టర్ చంద్రశేఖర్ గారు వచ్చి ఇరవై నిముషాలపాటు స్టోరీ వినిపించారు. ఆ విన్న ఇరవై నిముషాలకే నేను ఓకే చెప్పేశా. ఎందుకంటే స్టోరీ నన్ను చాలా ఆకట్టుకుంది. అలాగే డైరెక్టర్ గారు నాకు సరైన టైంలో కరెక్ట్ కథ తెచ్చారని చాలా హ్యాపీగా ఫీలయ్యాను. ఖచ్చితంగా ప్రేక్షకులు కొత్త నితిన్ చూస్తారు. అలాగే సినిమా కూడా వాళ్లకు బాగా నచ్చుతుందని అనుకుంటున్నా' అంటూ చెప్పుకొచ్చాడు.

అయితే హీరోయిన్ ప్రియా ప్రకాష్ మాట్లాడుతూ.. 'నేను ఈ సినిమాకు ముందు డైరెక్టర్ గారి మనమంతా సినిమా చూసాను. ఆ తర్వాత చంద్రశేఖర్ గారు వచ్చి ఇలా కథ చెప్పగానే నచ్చింది. ఓకే చెప్పేసాను. అయితే తెలుగులో కరెక్ట్ డెబ్యూకోసం ఎదురుచూస్తున్న టైంలో ఈ కథ రావడం ఆనందంగా ఉంది' అని చెప్పింది.

ఇక ఈ సినిమాలో కీలకపాత్ర అంటే హీరోకు చెస్ కోచ్ గా నటించిన సాయచంద్ మాట్లాడుతూ.. 'నిజానికి డైరెక్టర్ గారి 'అనుకోకుండా ఒకరోజు' సినిమా చూసి ఫిదా అయిపోయా. అసలు చాలా భాషల్లో సినిమాలు చూసాను కానీ ఇలాంటి సినిమా చూడలేదని అనిపించింది. అయితే ఈ సినిమాలో కోచ్ క్యారెక్టర్ వేయాల్సింది నసీరుద్దీన్ షా గారు. ఆయన డేట్స్ కుదరకపోవడంతో నాకు ఈ ఛాన్స్ వచ్చింది. అలాంటి గ్రేట్ యాక్టర్ పాత్ర నాకు రావడం ఆనందంగా ఉంది. అయితే ఉప్పెన షూటింగ్ లో ఉన్నప్పుడు డైరెక్టర్ వచ్చి క్యారెక్టర్ గురించి చెప్పారు. రెండు నెలలు ఆగాలని చెప్పాను. ఆయన వెయిట్ చేసి నాతో ఈ వేషం వేయించారు. ఈ సినిమాలో నితిన్ కు, నాకు మధ్య కెమిస్ట్రీ చాలా బాగుంటుందని' చెప్పారు.

అలాగే యాక్టర్ హర్షవర్ధన్ మాట్లాడుతూ.. నితిన్ నాకు ఎప్పటినుండో తెలుసు. అతను కామెడీ, లవ్, ఫ్యామిలీ ఇలా అన్ని జానర్స్ చేసాడు. నేను ఇదివరకు చెప్పాను 'నువ్ ఓసారి చంద్రశేఖర్ ఏలేటితో సినిమా చేయమని' కానీ చాలాసార్లు కుదరలేదని అన్నాడు. ఎందుకంటే వీరిద్దరి కాంబినేషన్ సెట్ అవుతుందని నాకు అనిపించింది. ఎప్పుడైతే సినిమా అనౌన్స్ మెంట్ వినిపించిందో చాలా హ్యాపీ' అని చెప్పాడు.ఈ విధంగా మొత్తానికి చెక్ టీమ్ సినిమా పట్ల చాలా నమ్మకంగా ఉన్నారని అర్ధమవుతుంది. చూడాలి మరి 26న ప్రేక్షకులు సినిమాను ఎలా రిసీవ్ చేసుకుంటారో!