వాల్తేరు వీర‌య్య ట్రైల‌ర్: మాస్ అనే ప‌దానికి బొడ్డు కోసి పేరెట్టిందే ఆయ‌న్ని సూసే!

సంక్రాంతి పందెంలో `వాల్తేరు వీర‌య్య‌` మాంచి జోష్ తో బ‌రిలో దిగుతున్న సంగ‌తి తెలిసిందే. ఎదుట ఎవ‌రు నిలిచినా బాస్ దుమారం ముందు బాక్సాఫీస్ లు బ‌ద్ద‌ల‌వ్వ‌డం ఖాయ‌మ‌న్న చ‌ర్చా సాగుతోంది. చాలా కాలానికి మెగాస్టార్ లోని మాసిజాన్ని వంద‌శాతం బ‌య‌ట‌కు తీస్తూ బాబి ఈ చిత్రాన్ని తెర‌కెక్కించ‌డంతో భారీ అంచ‌నాలేర్ప‌డ్డాయి. ముఠామేస్త్రి- రౌడీ అల్లుడు- గ్యాంగ్ లీడ‌ర్ కాలానికి మెగాస్టార్ లుక్ షిఫ్ట‌యి క‌నిపించ‌డంతో ఫ్యాన్స్ లో ఇప్ప‌టికే పూన‌కాలు మొద‌ల‌య్యాయి.

ఇటీవ‌ల‌ విడుద‌లైన లిరికల్ వీడియోలు టీజ‌ర్లు ఆక‌ట్టుకున్నాయి. పోస్ట‌ర్ల‌లో వీర‌య్య మాసిజానికి స‌రిహ‌ద్దు అన్న‌దే లేదు. వాల్తేరు వీర‌య్య‌గా ఆయ‌న‌లోని ఎన‌ర్జీ గ్రేస్ ఛామ్ ఏమాత్రం త‌గ్గ‌లేదు. రిలీజ్ ముందు వాల్తేరు వీరయ్యపై రోజురోజుకూ అంచనాలు పెరిగిపోతున్న‌ తీరు చూస్తుంటే `బాస్ ఈజ్ బ్యాక్` అన్న టాక్ వినిపిస్తోంది. తాజాగా వాల్తేరు వీర‌య్య ట్రైల‌ర్ విడుద‌లైంది. ట్రైల‌ర్ ఆద్యంతం మెగాస్టార్ చిరంజీవి మాస్ యాక్ష‌న్ ఎలివేష‌న్స్.. కామెడీ స‌న్నివేశాలు.. గూస్ బంప్స్ అనిపించే డైలాగులు ఆద్యంతం ర‌క్తి క‌ట్టించాయి.

అత‌డొక డ్ర‌గ్ స్మ‌గ్ల‌ర్.. డిపార్ట్ మెంట్ డేటా బేస్ లో అత‌డొక పాపుల‌ర్ ఖైదీ.. హీ ఈజ్ ఏ మాన్ స్ట‌ర్...అంటూ ట్రైల‌ర్ ఆరంభ‌మే రైజింగ్ గా స్టార్ట‌వ్వ‌డంతో ఒక‌టే ఎగ్జ‌యిట్ మెంట్ పెరిగింది. ఇక ``నీ క‌థ‌లోకి నేను రాలా.. నా క‌థ‌లోకే మీరంద‌రూ వ‌చ్చారు. మీరే నా ఎర‌.. నువ్వే నా సొర‌!`` అంటూ మెగాస్టార్ డైలాగులు అభిమానుల్లో పూన‌కాలు పుట్టించాయంటే అతిశ‌యోక్తి కాదు. ఇక ఇందులో సైలెంట్ కిల్ల‌ర్ లా ప్ర‌కాష్ రాజ్ ఎంట్రీ ఇంట్రెస్టింగ్.

మాస్ అనే ప‌దానికి బొడ్డు కోసి పేరెట్టిందే ఆయ‌న్ను సూసే...! అంటూ చిరులోని మాసిజానికి మ‌రో లెవ‌ల్లో క‌ల‌రిచ్చారు ద‌ర్శ‌క‌ర‌చ‌యిత‌లు. చిరు- శ్రుతి న‌డుమ కామెడీ స‌న్నివేశాలు రొమాన్స్ ర‌స‌ప‌ట్టు మీద సాగాయ‌ని ట్రైల‌ర్ భ‌రోసానిచ్చింది. ఇక ఈ ట్రైల‌ర్ లో మాస్ మ‌హారాజా ర‌వితేజ ఎంట్రీ మ‌రో లెవ‌ల్ అని చెప్పాలి. అత‌డి ఎంట్రీనే ఇర‌గ‌దీశాడు. వైజాగ్ సిటీలో అరాచ‌కాల్ని ఆపేందుకు వ‌చ్చే పోలీస్ క‌మీష‌న‌ర్ గా ర‌వితేజ క‌నిపించారు. హ‌లో బాసూ కొంచెం లెఫ్ట్ ట‌ర్నింగ్ ఇచ్చుకో! అంటూ గ్యాంగ్ లీడ‌ర్ డైలాగ్ ని రాజా ప‌లుకుతుంటే బాస్ ఫ్యాన్స్ విజిల్స్ తో మోతెక్కించ‌డం ఖాయంగా క‌నిపిస్తోంది. అయితే ఒకానొక ద‌శ‌లో ఆ ఇద్ద‌రి మ‌ధ్యా ఉన్న సాన్నిహిత్యాన్ని ట్రైల‌ర్ లో చూపించ‌డంతో ఫ్యాన్స్ లో మ‌రింత క్యూరియాసిటీ పెరిగింది. ఇక ఈ సినిమాలో ఖైదీనా? స్మ‌గ్ల‌రా? మాన్ స్ట‌రా? అంటూ ఎవ‌రి నుద్ధేశించి బిల్డ‌ప్ ఇచ్చారు? అన్న‌ది తెర‌పైనే చూసి తెలుసుకోవాలి. వీర‌య్య పేరుకు త‌గ్గ‌ట్టే విశాఖ జాలారి వారి పేట వాసుడిలా అచ్చుగుద్దిన‌ట్టు దిగిపోవ‌డంతో ఇక ఉత్త‌రాంధ్ర థియేట‌ర్లు పూన‌కాల‌తో ఊగిపోవ‌డం ఖాయంగా క‌నిపిస్తోంది.

వాల్తేరు వీర‌య్య మాస్ కి స్పెష‌ల్ ట్రీట్ అవుతుంద‌న‌డంలో సందేహం లేదు. ఇక ఈ ట్రైల‌ర్ లో దేవీశ్రీ రీరికార్డింగ్ జ‌స్ట్ యావ‌రేజ్ అనిపించ‌గా పాట‌ల ప‌రంగా ఇప్ప‌టికే అత‌డు త‌న స్థాయిలో మెప్పించిన సంగ‌తి తెలిసిందే. వీర‌య్య‌లోని బాసిజాన్ని బాబి ఏ రేంజులో చూపించ‌బోతున్నాడో తెలియాలంటే జ‌న‌వ‌రి 13 వ‌ర‌కూ వేచి చూడాల్సిందే. సంక్రాంతి పందెంలో వీర సింహారెడ్డితో పోటీప‌డుతూ వాల్తేరు వీర‌య్య హంగామా సృష్టించ‌బోతున్నాడు. ఈ ర‌స‌వ‌త్త‌ర పోటీతో తెలుగు రాష్ట్రాల్లో థియేట‌ర్లు క‌ళ‌క‌ళ‌లాడ‌నున్నాయి. మాస్ థియేట‌ర్లు ఈసారి ఊగిస‌లాడ‌డం ఖాయంగా క‌నిపిస్తోంది.