'వాల్తేరు వీరయ్య' యూఎస్ ప్రీమియర్ టాక్‌

మెగా ఫ్యాన్స్ తో పాటు సాదారణ సినీ ప్రేక్షకుల ఎంతో ఆసక్తిగా ఎదురు చూసిన వాల్తేరు వీరయ్య సినిమా నేడు ప్రేక్షకుల ముందుకు వచ్చేసింది. ఇండియాలో షో లు పడక ముందే యూఎస్ లో తెలుగు ప్రేక్షకులు ముఖ్యంగా మెగా ఫ్యాన్స్ వాల్తేరు వీరయ్య సినిమాను థియేటర్ లో ఎంజాయ్‌ చేస్తున్నారు. భారీ ఎత్తున యూఎస్ లో అడ్వాన్స్ బుకింగ్ జరిగింది.

యూఎస్ నుండి వాల్తేరు వీరయ్య సినిమా టాక్‌ సోషల్‌ మీడియాలో సందడి చేస్తోంది. కొందరు ఆహా ఓహో అంటూ కామెంట్స్ చేస్తూ ఉంటే మరి కొందరు మాత్రం మెగాస్టార్‌ మార్క్ కనిపించని మూస సినిమా అంటూ పెదవి విరుస్తున్నారు. మొత్తానికి వాల్తేరు వీరయ్య సినిమా కు యూఎస్ నుండి వస్తున్న టాక్‌ తో కాస్త గందరగోళం అయితే క్రియేట్‌ అయ్యింది.

వాల్తేరు వీరయ్య సినిమాలోని చిరంజీవి మరియు రవితేజ కాంబో సన్నివేశాల కోసం ప్రేక్షకులు చాలా ఆసక్తిగా ఎదురు చూశారు. కానీ ఒకటి రెండు సన్నివేశాలు మినహా పెద్దగా వారి కాంబో సన్నివేశాలు బ్లాస్ట్‌ అయిన దాఖలాలు లేవు అంటూ యూఎస్ ప్రేక్షకులు కొందరు సోషల్‌ మీడియాలో కామెంట్స్ చేస్తున్నారు.

బాస్ పార్టీ మరియు పూనకాలు లోడింగ్‌ పాటలు చూడ్డానికి మరియు వినడానికి కూడా బాగున్నాయట. సినిమాలోని పలు సన్నివేశాలు డ్రాగ్‌ చేసినట్లుగా.. రొటీన్‌ రివేంజ్ డ్రామా అన్నట్లుగా ఉన్నాయి అంటూ యూఎస్ రివ్యూలు చెబుతున్నారు.

వాల్తేరు వీరయ్య సినిమా మెగాస్టార్‌ ఫ్యాన్స్ కు కిక్‌ ఇస్తుందని కొందరు.. లేదు అని మరి కొందరు అక్కడ నుండి ట్విట్టర్ ద్వారా రివ్యూలు ఇస్తున్నారు. అసలు మ్యాటర్ ఏంటీ... వాల్తేరు వీరయ్య మాస్ జనాలకు ఎక్కేసిందా అనేది చూడాలి అంటే మరి కొంత సమయం ఆగాల్సిందే.

తెలుగు రాష్ట్రాల్లో మొదటి రెండు మూడు షో ల యొక్క టాక్ తర్వాత అసలు ఫలితం వచ్చే అవకాశం ఉంది.