హాలీవుడ్ లో దీపిక ఐటం సాంగ్

దీపికా పదుకొనే ప్రస్తుతం బాలీవుడ్ టాప్ హీరోయిన్. ఈ భామ కనిపిస్తే చాలు.. బాక్సాఫీస్ దగ్గర కనకవర్షం కురిసిపోతోంది. ఫిమేల్ సెంట్రిక్ క్యారెక్టర్ ఆధారిత చిత్రం అయిన పద్మావత్ లో.. ఈమె నటన అసామాన్యం. అయితే.. ఇప్పటికే దీపికా పదుకొనే హాలీవుడ్ మూవీ కూడా చేసింది.

ట్రిపుల్ ఎక్స్- రిటర్న్ ఆఫ్ ది క్సాండర్ కేజ్ మూవీలో దీపికా పదుకొనే యాక్ట్ చేసిన సంగతి తెలిసిందే. గతేడాది ఆరంభంలో వచ్చిన ఈ చిత్రంలో.. లెంగ్తీ రోల్ కాదు కానీ.. కాసింత ప్రాధాన్యం ఉన్న పాత్రలోనే దీపిక కనిపించింది. ఇప్పుడీ సినిమాకు మరో సీక్వెల్ రాబోతోంది. ట్రిపుల్ ఎక్స్4 రెడీ అయిపోతోంది. ఈ సినిమాలో సెరెనా ఉంగర్ పాత్రను కంటిన్యూ చేయబోతున్నారట. దీపిక పోషించిన ఈ పాత్ర.. కొత్త సినిమాలోనూ ఉంటుందట. మరి ఆ రోల్ ఉంటే దీపికా పదుకొనే కూడా ఉండాలి కదా. ఈ విషయంపై మన బ్యూటీ క్లారిటీ ఇవ్వలేదు కానీ.. చిత్ర దర్శకుడు మాత్రం తన ఉధ్దేశ్యాన్ని చెప్పేశాడు.

ట్రిపుల్ ఎక్స్4 చిత్రాన్ని తాను బాలీవుడ్ టైపు డ్యాన్సింగ్ సాంగ్ తో ముగించాలని తాను కోరుకుంటున్నానని.. దీపికా పదుకొనేతో లుంగీ డ్యాన్స్ లేదా మరో కొత్త పాయింట్ తో ఈ సాంగ్ ను చిత్రీకరించాలని భావిస్తున్నానని చెప్పాడు డైరెక్టర్. ట్రిపుల్ ఎక్స్ లేటెస్ట్ మూవీలో దీపిక ఉంటుందని.. విన్ డీజిల్ గతంలోనే ప్రకటించాడు. ఇక తాను మరో హాలీవుడ్ మూవీ చేస్తున్నట్లు దీపిక కూడా చెప్పేస్తే.. ఈ న్యూస్ అఫీషియల్ అయిపోతుంది. అయితే ఎంత చెప్పినా కూడా.. దీపిక చేసేదే కేవలం ఐటం సాంగే అని అర్ధమవుతోంది. అది సంగతి.