'భోళా శంకర్' సర్ప్రైజ్: మెగాస్టార్ స్వాగ్ తో కొత్త ఏడాదికి స్వాగతం..!

మెగాస్టార్ చిరంజీవి లైన్ లో పెట్టిన ఐదు చిత్రాల్లో ''భోళా శంకర్'' ఒకటి. మెహర్ రమేష్‌ దర్శకత్వంలో ఈ సినిమా తెరకెక్కుతోంది. ఇది తమిళ్ లో బ్లాక్ బస్టర్ విజయం సాధించిన ‘వేదాళమ్’ చిత్రానికి అధికారిక తెలుగు రీమేక్‌. అన్నాచెల్లెళ్ల బంధం చుట్టూ తిరిగే ఈ యాక్షన్ మూవీలో మెహర్ రమేష్ తెలుగు నేటివిటీకి తగ్గట్టుగా మార్పులు చేర్పులు చేశారు.

'భోళా శంకర్' చిత్రంలో మిల్కీ బ్యూటీ తమన్నా భాటియా హీరోయిన్ గా నటిస్తోంది. చిరంజీవి సోదరిగా మహానటి కీర్తి సురేష్ కనిపించనుంది. ఇటీవలే సెట్స్ మీదకు వెళ్లిన ఈ మూవీ రెండు షెడ్యూల్స్ షూటింగ్ పూర్తి చేసుకుంది. ఈ నేపథ్యంలో కొత్త సంవత్సరం ప్రారంభం సందర్భంగా మెగా సర్ప్రైజ్ ఇవ్వడానికి రెడీ అయ్యారు.

'స్వాగ్ ఆఫ్ భోళా' పేరుతో రేపు (జనవరి 1) ఉదయం 9 గంటలకు ఓ గ్లిమ్స్ రిలీజ్ చేస్తున్నట్లు మేకర్స్ ప్రకటించారు. మెగాస్టార్ స్వాగ్ తో ఈ నూతన సంవత్సరాన్ని సెలబ్రేట్ చేసుకుందాం అని పేర్కొన్నారు. చిరంజీవి లుక్ కోసం మెగా అభిమానులు ఆతృతగా ఎదురుచూస్తున్నారు.

కాగా, పవర్ ఫుల్ మాస్ యాక్షన్ ఎంటర్‌టైనర్‌ గా రూపొందనున్న 'భోళాశంకర్' చిత్రాన్ని రామబ్రహ్మం సుంకర సమర్పణలో ఏకే ఎంటర్టైనెంట్స్ బ్యానర్ పై అనిల్ సుంకర నిర్మిస్తున్నారు. క్రియేటివ్ కమర్షియల్స్ సంస్థ నిర్మాణంలో భాగం పంచుకుంటోంది. మణిశర్మ తనయుడు మహతి స్వరసాగర్ ఈ చిత్రానికి సంగీతం సమకూరుస్తున్నారు.

డూడ్లీ సినిమాటోగ్రఫీ అందిస్తుండగా.. ఏఎస్ ప్రకాశ్ ఆర్ట్ డైరెక్టర్ గా వర్క్ చేస్తున్నారు. మార్తాండ్ కె వెంకటేష్ ఎడిటింగ్ బాధ్యతలు స్వీకరించారు. 'భోళాశంకర్' చిత్రంలో రఘు బాబు - రావు రమేష్ - మురళి శర్మ - రవి శంకర్ - వెన్నెల కిషోర్ - తులసి - ప్రగతి - శ్రీ ముఖి - బిత్తిరి సత్తి - సత్య - గెటప్ శ్రీను - రష్మీ గౌతమ్ - ఉత్తేజ్ - ప్రభాస్ శ్రీను తదితరులు నటిస్తున్నారు.