బాలయ్య-వినాయక్.. ఏంటి సంగతి?

ఒకప్పుడు వీవీ వినాయక్ తో సినిమా అంటే స్టార్లందరూ ఆసక్తి చూపేవారు. గతంలో మాస్ ఎంటర్ టైనర్ లకు కేరాఫ్ అడ్రెస్ గా నిలిచిన వినాయక్ గ్రాఫ్ ఈ మధ్య పూర్తిగా పడిపోయింది. చిరంజీవి రీ-ఎంట్రీ ఫిలిం 'ఖైది నంబర్ 150' కు దర్శకత్వం వహించి దాన్ని బ్లాక్ బస్టర్ గా మలిచినా ఆ సక్సెస్ క్రెడిట్ వినాయక్ ఖాతాలో పడలేదు. ఆ తర్వాత వచ్చిన 'ఇంటిలిజెంట్' వినాయక్ ఇమేజ్ ను దారుణంగా దెబ్బ తీసింది. దాని తర్వాత బాలయ్య తో సినిమా లైన్ లో ఉందన్నారు. ఇప్పుడు అది కూడా సైడ్ అయిపోయిందట.

ప్రొడ్యూసర్ C. కళ్యాణ్ బాలయ్యతో 'జైసింహా' నిర్మించిన సంగతి తెలిసిందే. ఆ సినిమా విజయవంతం కావడంతో బాలయ్య C. కళ్యాణ్ బ్యానర్లో మరో సినిమా చేసేందుకు గ్రీన్ సిగ్నల్ ఇచ్చారు. ఈ సినిమాకు వినాయక్ ను డైరెక్టర్ గా తీసుకున్నారు. ఈ ఏడాదిలోనే ఈ సినిమా పట్టాలెక్కాల్సి ఉంది గానీ వినాయక్ చెప్పిన కథలేవీ బాలయ్యను మెప్పించలేదట. బాలయ్య ఎంత టైమ్ ఇచ్చినా వినాయక్ సరైన కథ తీసుకురాలేక పోవడంతో ప్రస్తుతానికి ఆ ప్రాజెక్టును పక్కన పెట్టేశాడని అంటున్నారు.

బాలయ్య ప్రస్తుతం ఎన్టీఆర్ బయోపిక్ లో నటిస్తున్నాడు. ఈ సినిమా తర్వాత బోయపాటి శ్రీను.. అనిల్ రావిపూడి ప్రాజెక్టులు లైన్లో ఉన్నాయట. మరోవైపు వచ్చే ఏడాది ఎలెక్షన్స్ కూడా ఉండడంతో వినాయక్ తో సినిమా చేసే అవకాశం లేదని అంటున్నారు.