ఇంట‌ర్నేష‌న‌ల్ స్టార్ తో హార‌ర్ కామెడీ ఏంటి రాజా..?

ప్రస్తుతం వరుస పాన్ ఇండియా చిత్రాలతో బిజీగా ఉన్న యంగ్ రెబల్ స్టార్ ప్రభాస్.. వినోదాత్మక సినిమాల దర్శకుడు మారుతితో ఓ ప్రాజెక్ట్ ఓకే చేసినట్లు గత కొన్ని రోజులుగా వార్తలు వస్తున్నాయి. డీవీవీ ఎంటర్టైన్మెంట్స్ పతాకంపై డీవీవీ దానయ్య ఓ సినిమా నిర్మించడానికి సన్నాహాలు చేస్తున్నారని అంటున్నారు. ఈ విషయాన్ని మేకర్స్ కంఫర్మ్ చేయనప్పటికీ.. ఈ వార్తలను ఖండించకుండా కాలమే అన్నిటికీ సమాధానం చెబుతుందని మారుతి చేసిన ట్వీట్ ఈ ప్రాజెక్ట్ ఉందనడానికి బలం చేకూర్చింది.

ప్రభాస్ - మారుతి కాంబినేషన్ లో రాబోయే చిత్రానికి 'రాజా డీలక్స్' టైటిల్ కూడా ఖరారు చేసినట్టు చెప్పుకుంటున్నారు. ఇదే క్రమంలో ఇదొక హారర్ కామెడీ మూవీ అని.. ఫ్యామిలీ ఎమోషన్స్ తో పాటుగా రొమాన్స్ కూడా కాస్త ఎక్కువగానే ఉంటాయని టాక్ నడుస్తోంది. అంతేకాదు ప్రభాస్ కోసం ముగ్గురు హీరోయిన్లను తీసుకోబోతున్నారని అంటున్నారు.

నిజానికి ప్రభాస్ - మారుతి కాంబోలో సినిమా అనగానే డార్లింగ్ ఫ్యాన్స్ అందరూ స‌ర్‌ప్రైజ్ అయ్యారు. 'బాహుబలి' సినిమాతో ప్రపంచవ్యాప్తంగా గుర్తింపు తెచ్చుకున్న ప్రభాస్.. ప్రెజెంట్ అదే స్థాయిలో సినిమాలు ప్లాన్ చేసుకుంటున్నారు. కానీ మారుతి ఇంతవరకు పెద్ద హీరోలతో సినిమాలు చేయలేదు.. భారీ బడ్జెట్ ప్రాజెక్ట్స్ హ్యాండిల్ చేయలేదు. అందుకే ఎవరూ ఊహించని కలయిక కావడంతో ఆశ్చర్యపోయారు.

ఇప్పుడు ప్రభాస్ తో హారర్ కామెడీ చేయనున్నారనే వార్తలు కూడా అభిమానులకు మింగుడు పడటం లేదని సోషల్ మీడియాలో టాక్ వినిపిస్తోంది. ఇప్పటికే మారుతి 'ప్రేమకథా చిత్రమ్' అనే హారర్ కామెడీ థ్రిల్లర్ ని తెరకెక్కించారు. ఇప్పుడు ప్రభాస్ తో ముగ్గురు ముద్దుగుమ్మలతో హారర్ కామెడీ అంటుంటే.. రాఘవ లారెన్స్ 'కాంచ‌న' - ఓంకార్ 'రాజుగారి గది' సినిమాల ఫ్లేవ‌ర్ లో ఉంటుందేమో అని కామెంట్స్ చేస్తున్నారు.

మరోవైపు ప్రభాస్ లాంటి ఇంట‌ర్నేష‌న‌ల్ స్టార్ ని పెట్టుకొని హార‌ర్ కామెడీ చేయడమేంటి మారుతీ అని ఫ్యాన్స్ సర్కిల్స్ నుంచి సెటైర్స్ వస్తున్నాయని తెలుస్తోంది. ప్రస్తుతానికైతే ఈ ప్రాజెక్ట్ గురించి ఎలాంటి అధికారిక ప్రకటన రాలేదు. కాకపోతే ప్రభాస్ లైనప్ చూస్తుంటే.. డిఫెరెంట్ జోనర్స్ లో సినిమాలు చేయడానికి ఆసక్తి కనబరుస్తున్నట్లు అర్థం అవుతోంది. ఇందులో భాగంగా మారుతితో హారర్ కామెడీ చేసే ఛాన్స్ లేకపోలేదు. త్వరలోనే ఈ సినిమా మీద స్పష్టత వస్తుందేమో చూడాలి.