రావు రమేష్ గూనికి కేజీఎఫ్ 2 రిలీజ్ కి ఏంటా లింకు?

2020-21 మోస్ట్ అవైటెడ్ మూవీగా కేజీఎఫ్ చాఫ్ట‌ర్ 2 రికార్డుల్లో ఉన్న సంగ‌తి తెలిసిందే. ఈ సినిమాని జూలై 16న రిలీజ్ చేయ‌నున్నామ‌ని ఇంత‌కుముందు టీమ్ ప్ర‌క‌టించింది. కానీ ఇటీవ‌ల కోవిడ్ సెకండ్ వేవ్ అంతా మార్చేసింది. ఆ త‌ర్వాత ప‌లు పాన్ ఇండియా సినిమాల‌తో పాటు భారీ చిత్రాల రిలీజ్ తేదీలు వాయిదా ప‌డ్డాయి. కానీ ఇప్ప‌టివ‌ర‌కూ కేజీఎఫ్ 2ని వాయిదా వేస్తున్నామ‌ని హోంబ‌లే సంస్థ కానీ ప్ర‌శాంత్ నీల్ కానీ అధికారికంగా ప్ర‌క‌టించ‌లేదు. మీడియాలో ర‌క‌ర‌కాల ఊహాగానాలు మాత్ర‌మే వెలువ‌డ్డాయి.

ఇప్ప‌టికీ ఈ సినిమా రిలీజ్ తేదీ జూలై 16 గానే ఫిక్స‌వుతున్నారు అభిమానులు. నిన్న‌టిరోజున వార్తాపత్రిక నేపథ్య పోస్టర్ లో స‌హాయ‌నటుడు రావు రమేష్ లుక్ ని రివీల్ చేసిన సంగ‌తి తెలిసిందే. ఆయ‌న‌ సిబిఐ అధికారి కన్నెగంటి రాఘవన్ గా ఈ చిత్రంలో క‌నిపించ‌నున్నారు. ప‌త్రికా పోస్ట‌ర్ పై స్ప‌ష్ఠంగా ``నెక్స్ట్ చాప్టర్ వచ్చే జూలై 16 నుంచి కంటిన్యూ అవుతుంది`` అని ప్ర‌క‌టించారు. అంటే దీన‌ర్థం రిలీజ్ తేదీ మార‌లేద‌నే.. రావు రమేష్ ఈ చిత్రంలో గూనితో క‌నిపిస్తారు. ఆయ‌న‌ సిబిఐ అధికారి కన్నెగంటి రాఘవన్ పాత్రలో అద్భుత అభినివేశం చేశార‌ని తెలుస్తోంది.

ఈ చిత్రంలో య‌ష్‌ రాకీ భాయ్ గా క‌నిపిస్తారు. శ్రీనిధి శెట్టి యష్ సరసన రీనా దేశాయ్ పాత్రలో నటించనున్నారు. భారత ప్రధాని రమికా సేన్ పాత్రలో రవీనా న‌టిస్తున్నారు. విల‌న్ అధీరాగా సంజయ్ దత్ క‌నిపిస్తారు. అనంత్ నాగ్- అచ్యుత్ కుమార్- మాలవికా అవినాష్- ప్రకాష్ రాజ్ తదితరులు న‌టిస్తున్నారు. ఈ ఏడాది జనవరి 7 న యూట్యూబ్ లో 170 మిలియన్ల వ్యూస్ తో ట్రైలర్ సంచ‌ల‌నం సృష్టించింది. ఈ సీక్వెల్ కూడా కర్ణాటక కోలార్ బంగారు క్షేత్రాల నేపథ్యంలో తెర‌కెక్కింది.

కేజీఎఫ్ 2 ని హోంబాలే ఫిల్మ్స్ పతాకంపై విజయ్ కిరంగదూర్ నిర్మిస్తున్నారు. రవి బస్రూర్ సంగీతం అందిస్తున్నారు. భువన్ గౌడ సినిమాటోగ్రఫీ అందిస్తున్నారు.