ఎన్టీఆర్ కోసం పవర్ ఫుల్ టైటిల్ ని పరిశీలిస్తున్న కొరటాల..!

ప్రస్తుతం 'ఆర్.ఆర్.ఆర్' సినిమాలో నటిస్తున్న యంగ్ టైగ‌ర్ ఎన్టీఆర్.. తదుపరి చిత్రం కొరటాల శివ దర్శకత్వంలో చేయనున్న విషయం తెలిసిందే. 'జనతా గ్యారేజ్' వచ్చిన ఐదేళ్ల తర్వాత వీరి కాంబోలో మరో సినిమాకి అధికారిక ప్రకటన రావడంతో ఫ్యాన్స్ ఖుషీ అయ్యారు. నందమూరి కళ్యాణ్ రామ్ సమర్పణలో యువసుధ ఆర్ట్స్ బ్యానర్ పై మిక్కిలినేని సుధాకర్ ఈ చిత్రాన్ని నిర్మించనున్నారు. పాన్ ఇండియా స్థాయిలో ఈ సినిమా తెరకెక్కనుంది.

అయితే కొరటాల శివ 'NTR30' చిత్రానికి ''సెన్సేషనల్'' అనే టైటిల్ ని పరిశీలిస్తున్నట్లు వార్తలు వస్తున్నాయి. ఇందులో నిజమెంతో తెలియదు కానీ టైటిల్ మాత్రం పవర్ ఫుల్ గా ఉంది. శక్తివంతమైన పాత్రలు పోషించే తారక్ కు తగినట్లుగానే ఉంటుందని అభిమానులు కామెంట్స్ చేస్తున్నారు. మరి చివరకు ఎలాంటి టైటిల్ ని ఖరారు చేస్తారో చూడాలి. ఇకపోతే స్టూడెంట్ పాలిటిక్స్ బ్యాక్ డ్రాప్ లో ఈ సినిమా ఉంటుందని టాక్ నడుస్తోంది.

ప్రస్తుతం ఎన్టీఆర్ - కొరటాల కలిసి డిస్కష్ చేసుకున్న ఓ పాయింట్ ని స్క్రిప్ట్ గా మలిచే పనిలో ఉన్నారు. సామాజిక అంశాల‌కు తనదైన శైలిలో క‌మ‌ర్షియ‌ల్ హంగులు జోడించి బ్లాక్ బస్టర్స్ అందిస్తున్న డైరెక్టర్ కొరటాల శివ.. ఈసారి ఎలాంటి కథను రెడీ చేస్తారో చూడాలి. ఏదేమైనా తారక్ కెరీర్ లో వస్తున్న ఈ 30వ చిత్రం పై అభిమానులు భారీ అంచనాలు పెట్టుకున్నారు. 'ఆర్.ఆర్.ఆర్' షూటింగ్ పూర్తయిన తర్వాత ఈ ప్రాజెక్ట్ సెట్స్ పైకి వెళ్లనుంది. దీని తర్వాత 'కేజీఎఫ్' ఫేమ్ ప్రశాంత్ నీల్ తో ఎన్టీఆర్ ఓ పాన్ ఇండియా మూవీ చేయనున్నారు.