సక్సెస్ ట్రాక్ ఎక్కడానికి చిరు ఎలాంటి నిర్ణయం తీసుకుంటారో..!

మెగాస్టార్ చిరంజీవి రీఎంట్రీ తర్వాత వరుసగా సినిమాలు లైన్ లో పెడుతూ బిజీగా గడుపుతున్నారు. కరోనా పాండమిక్ వల్ల షూటింగులు డిలే అవ్వడంతో సినిమాలు విడుదల కాలేదు కానీ.. లేకపోతే ఈపాటికే రెండు లేదా మూడు చిత్రాలు ప్రేక్షకుల ముందుకు వచ్చేవి. ఏదైతేనేం 2019లో వచ్చిన 'సైరా నరసింహా రెడ్డి' తర్వాత ఇటీవల ''ఆచార్య'' చిత్రంతో పలకరించారు చిరు.

మెగా తండ్రీకొడుకులు చిరంజీవి మరియు రామ్ చరణ్ హీరోలుగా కొరటాల శివ దర్శకత్వంలో తెరకెక్కిన 'ఆచార్య' సినిమా బాక్సాఫీస్ వద్ద బోల్తా కొట్టింది. భారీ అంచనాల మధ్య విడుదలైన ఈ చిత్రం.. టాలీవుడ్ లో అతి పెద్ద డిజాస్టర్స్ లో ఒకటిగా నిలిచింది. దీంతో చిరు ఎన్నడూలేని విధంగా ఆడియన్స్ నుంచి ట్రోల్స్ ఎదుర్కోవాల్సి వచ్చింది.

ఈ నేపథ్యంలో మెగాస్టార్ తన రాబోయే సినిమాల లైనప్ ను సవరించుకుంటున్నారని ఊహాగానాలు వినిపిస్తున్నాయి. చిరు ప్రస్తుతం నటిస్తున్న 'గాడ్ ఫాదర్' 'భోళా శంకర్' లతో పాటుగా కేఎస్ రవీంద్ర (బాబీ) ప్రాజెక్ట్స్ సెట్స్ మీద ఉన్నాయి. 'ఆచార్య' ప్లాప్ నుంచి బయటపడి కచ్చితంగా బ్లాక్ బస్టర్ అందుకోవాల్సిన తరుణంలో.. సీనియర్ హీరో వీటిల్లో ఏ చిత్రాన్ని ముందుగా పూర్తి చేయాలనే ఆలోచనలో పడ్డారని టాక్.

మోహన్ రాజా దర్శకత్వంలో చిరు ‘గాడ్ ఫాదర్’ అనే పొలిటికల్ యాక్షన్ థ్రిల్లర్ లో నటిస్తున్నారు. 'లూసిఫర్' కి రీమేక్ గా రూపొందుతున్న ఈ చిత్రంలో సల్మాన్ ఖాన్ - నయనతార - సత్యదేవ్ లు కీలక పాత్రలు పోషిస్తున్నారు. కొణిదెల ప్రొడక్షన్ కంపెనీ మరియు సూపర్ గుడ్ ఫిలింస్ సంస్థలు కలిసి ఈ సినిమాని నిర్మిస్తున్నాయి.

అలానే మెహర్ రమేష్ దర్శకత్వంలో 'భోళా శంకర్' అనే సినిమా చేస్తున్నారు మెగాస్టార్. ఇది తమిళ మూవీ 'వేదాళం' కి రీమేక్. ఇందులో తమన్నా హీరోయిన్ గా నటిస్తుండగా.. చెల్లెలి పాత్రలో కీర్తి సురేష్ నటిస్తోంది. ఏకే ఎంటర్టైన్మెంట్స్ బ్యానర్ పై ఈ మాస్ యాక్షన్ ఎంటర్టైనర్ రూపొందుతోంది.

అయితే 'గాడ్ ఫాదర్' మరియు 'భోళా శంకర్' రెండూ రీమేక్ చిత్రాలే అవడం గమనార్హం. స్ట్రాంగ్ కంబ్యాక్ ఇవ్వడానికి రీమేకులను సేఫ్ ప్రాజెక్ట్స్ గా భావించవచ్చు. అదే సమయంలో అంతే రిస్క్ కూడా ఉంది. పవన్ కళ్యాణ్ చేసిన 'వకీల్ సాబ్' 'భీమ్లా నాయక్' వంటి రిమేక్ చిత్రాలు హిట్ టాక్ తెచ్చుకున్నా.. ఎలాంటి ఫలితాన్ని అందుకున్నాయో చెప్పాల్సిన అవసరం లేదు.

ఇప్పుడు చిరంజీవి రీమేక్స్ తో కాకుండా స్ట్రెయిట్ మూవీతో హిట్ కొట్టాలని అనుకుంటే మాత్రం బాబీ చిత్రానికి ప్రాధాన్యత ఇవ్వాల్సి ఉంటుంది. మైత్రీ మూవీ మేకర్స్ బ్యానర్ లో రూపొందుతున్న ఈ చిత్రానికి 'వాల్తేరు వీరయ్య' అనే టైటిల్ ను ఖరారు చేసినట్లు సమాచారం. ఇందులో శృతి హాసన్ హీరోయిన్ గా నటిస్తుండగా.. రవితేజ కీలక పాత్రలో కనిపించనున్నారు.

అప్పుడెప్పుడో ఈ సినిమా రెగ్యులర్ షూటింగ్ స్టార్ట్ చేసినప్పటికీ.. మిగతా సినిమాల షెడ్యూల్స్ ను ముందుగా పూర్తి చేస్తుండటంతో.. చిరంజీవి ఈ ప్రాజెక్ట్ పై తగినంత శ్రద్ధ చూపలేదనే కామెంట్స్ వచ్చాయి. ఇప్పుడు ఒకవేళ 'వాల్తేరు వీరయ్య' ను మొదట రిలీజ్ చేయాలని అనుకుంటే.. 'గాడ్ ఫాదర్' 'భోళా శంకర్' పనులు నెమ్మదిగా సాగే అవకాశం ఉంది. మరి సక్సెస్ ట్రాక్ ఎక్కడానికి చిరు ఎలాంటి నిర్ణయం తీసుకుంటారో చూడాలి.