విక్రం షాక్స్-సచిన్ రాక్స్

అనుకుంటాం కాని సినిమాల్లో మనకు ఎంత పాపులారిటీ వచ్చినా దేశంలో ఉన్న ప్రతి ఒక్కరికి మనం తెలిసే ఉంటాం అన్న రూల్ ఏమి లేదు. ఎందుకంటే సినిమా అనే పదార్థానికి దూరంగా ఉండే వాళ్ళు కూడా కోట్లలో ఉన్నారు. అందులో కూడా సెలెబ్రిటీలు కూడా ఉంటారు. ఇది ఋజువు చేయడానికి కాబోలు తమిళ్ స్టార్ హీరో చియాన్ విక్రంకు ఒక వింత అనుభవం ఎదురైంది. ఓ షో కోసం ముంబై వెళ్ళిన విక్రం అది పూర్తవ్వగానే ఫ్లైట్ క్యాచ్ చేసి తన సీట్ లో కూర్చున్నాడు. పక్కన ఎవరున్నారు చెప్మా అని తల తిప్పి చూస్తే క్రికెట్ దేవుడు సచిన్ టెండూల్కర్. ఇంకేముంది. క్రికెట్ ను అందులోనూ సచిన్ ను అమితంగా ఇష్టపడే విక్రం ఆయనే పక్కన ఉండేసరికి ఉత్సాహం పట్టలేక పలకరించాడు. బదులుగా సచిన్ నువ్వెవరు అని అడగంతో విక్రంకు ఫ్యుజులు యెగిరి పోయాయి.

బాలీవుడ్ బిగ్ బి కూడా తనను గుర్తుపడతారు కదా అలాంటిది తాను సచిన్ కు తెలిసే ఉంటాను అనుకున్న విక్రం కు సచిన్ పెద్ద ఝలక్ ఇచ్చాడు. ఇక తనను తాను పరిచయం చేసుకోక తప్పలేదు విక్రంకు. తాను సౌత్ ఇండియాలో ఎంత స్టారో వివరిస్తూ తన సినిమాల విశేషాలు చెప్పాక కాని సచిన్ కు క్లారిటీ రాలేదట. పాపం విక్రం మాత్రం ఫస్ట్ టైం ఇలాంటి అనుభవం ఎదురు కావడంతో మహా ఫీల్ అయిపోయాడు. దీనికి కారణం సచిన్ చెప్పాడట. సాధారణంగా తాను హాలీవుడ్ సినిమాలు మాత్రమే చూస్తానని, అందుకే సౌత్ సినిమాల్లో నటించే హీరోల గురించి పెద్దగా అవగాహన లేదని చెప్పడంతో విక్రం మనసు కుదుటపడింది

ఇదంతా విక్రం స్వయంగా పంచుకున్నాడు. క్రికెట్ ప్రపంచంగా బ్రతికే సచిన్ లాంటి వాళ్ళు సినిమాలు రెగ్యులర్ గా చూడటం జరిగే పని కాదు లెండి. అలాగని సచిన్ కు ఇక్కడ ఎవరు తెలియదని కాదు. చిరంజీవి, నాగార్జున లాంటి వాళ్ళతో సచిన్ కు మంచి స్నేహపూర్వక సత్సంబంధాలు ఉన్నాయి. తమిళ్ వరకు సచిన్ కు రజనికాంత్, కమలహాసన్ తప్ప ఇంకెవరు తెలిసి ఉన్నట్టు లేదు. ఇలాంటి కొన్ని అనుభవాలు మంచి జ్ఞాపకాలుగా మిగిలిపోతాయి. అందుకే షేర్ చేసుకున్నాడు విక్రం.