పాన్ ఇండియా సినిమాల విడుదలపై ఎప్పుడు క్లారిటీ వస్తుందో..!

యావత్ సినీ అభిమానులు ఆసక్తిగా ఎదురు చూస్తున్న సినిమాలలో ముఖ్యంగా మూడు పాన్ ఇండియా చిత్రాలను చెప్పుకోవచ్చు. దర్శకధీరుడు రాజమౌళి తెరకెక్కిస్తున్న 'ఆర్.ఆర్.ఆర్'.. యంగ్ రెబల్ స్టార్ ప్రభాస్ నటిస్తున్న 'రాధే శ్యామ్'.. కన్నడ రాకింగ్ స్టార్ యష్ 'కేజీఎఫ్ 2' చిత్రాలపై భారీ అంచనాలు నెలకొన్నాయి. అయితే ఈ సినిమాలు ఎప్పటి నుంచో షూటింగ్స్ జరుపుకుంటున్నా విడుదల ఎప్పుడు అనే దానిపై మాత్రం క్లారిటీ రావడం లేదు.

వాస్తవానికి యంగ్ టైగర్ ఎన్టీఆర్ - మెగా పవర్ స్టార్ రామ్ చరణ్ కలిసి నటిస్తున్న 'ఆర్.ఆర్.ఆర్' సినిమా ల్ క‌రోనా లాక్ డౌన్ విధించే సమయానికి ప్రీ ప్రొడ‌క్ష‌న్ వ‌ర్క్ నాలుగు నెల‌లు మాత్ర‌మే మిగిలి ఉంది. లాక్ డౌన్ త‌రువాత సినిమా షూటింగ్స్ సంపూర్ణంగా మొద‌లై దాదాపు ఆరు నెల‌లు పైనే అవుతుంది. మ‌రి ఈ లెక్క‌న చూస్తే ట్రిపుల్ ఆర్ ఇప్పటికే పూర్తయి ఉండాలి. కానీ ఇంతవరకు ఈ సినిమా విడుద‌లపై రాజమౌళి అండ్ టీమ్ ఎలాంటి ప్రకటన ఇవ్వ‌లేదు.

దర్శకుడు ప్రశాంత్ నీల్ తెరకెక్కిస్తున్న 'కేజీఎఫ్ 2' సినిమా షూటింగ్ కూడా ఇంకా మిగిలి ఉందని తెలుస్తోంది. దీనికి సంబంధించిన కొన్ని కీలక స‌న్నివేశాల చిత్రీక‌ర‌ణ కోసం హైదరాబాద్ లోని ఆర్ఎఫ్సీ అల్యూమీనియం ఫ్యాక్ట‌రీని సిద్ధం చేస్తున్నారట. ఇక రాధాకృష్ణ కుమార్ - ప్రభాస్ కాంబోలో రూపొందుతున్న 'రాధేశ్యామ్' సినిమా షూటింగ్ కంప్లీట్ అయింది. కానీ పోస్ట్ ప్రొడ‌క్ష‌న్ వ‌ర్క్ ఇంకా మిగిలి ఉండటంతో ఈ సినిమా విడుద‌లపై స్పష్టత రావడం లేదు. ఏదేమైనా పాన్ ఇండియా సినిమాలు అంటూ హ‌డావుడి చేస్తున్న ప్రాజెక్ట్స్ అన్ని ఈ ఏడాది ఎప్పుడు వ‌స్తాయో తెలియ‌క మిగ‌తా వాళ్లు త‌మ సినిమాల రిలీజుల్ని ఆపుకుంటున్నారని తెలుస్తోంది.