'నారప్ప' ట్రైలర్ - ఓటీటీ రిలీజ్ డేట్ ని ఎప్పుడు ప్రకటిస్తారంటే..!

విక్టరీ వెంకటేష్ హీరోగా శ్రీకాంత్ అడ్డాల దర్శకత్వంలో రూపొందుతున్న తాజా చిత్రం ''నారప్ప''. ధనుష్ తమిళ బ్లాక్ బస్టర్ హిట్ 'అసురన్' చిత్రానికి ఇది అధికారిక తెలుగు రీమేక్. సమాజంలోని కుల వ్యవస్థ - మనుషుల మధ్య సామాజిక అంతరాలు వంటివి ఈ చిత్రంలో ప్రస్తావిస్తున్నారు. వెంకీ ఇందులో యువకుడిగా.. ఇద్దరు పిల్లల తండ్రిగా.. మధ్య వయస్కుడిగా విభిన్నమైన లుక్స్ లో కనిపించనున్నాడు. ఇప్పటికే సెన్సార్ కార్యక్రమాలు పూర్తి చేసుకున్న ఈ చిత్రాన్ని త్వరలోనే ప్రేక్షకుల ముందుకు తీసుకురానున్నారు. అయితే థియేట్రికల్ రిలీజ్ ని స్కిప్ చేసి డైరెక్ట్ ఓటీటీ ఫ్లాట్ ఫార్మ్ లో విడుదల చేయనున్నారని తెలుస్తోంది.

మే 14న విడుదల అవ్వాల్సిన 'నారప్ప' కోవిడ్ సెకండ్‌ వేవ్‌ నేపథ్యంలో వాయిదా పడింది. థియేటర్లు ఎప్పుడు తెరుస్తారనే విషయంపై క్లారిటీ లేకపోవడంతో మేకర్స్ ఓటీటీ రిలీజ్ కు మొగ్గుచూపారట. ఈ మేరకు ప్రముఖ ఓటీటీ అమెజాన్ ప్రైమ్ వీడియోతో డీల్ కుదుర్చుకున్నారట. అంతేకాదు జూలై మూడో వారంలో విడుద‌ల అవ్వ‌బోతుందని టాక్ వినిపిస్తోంది. అలానే ఈ నెల రెండో వారంలో చిత్ర ట్రైలర్ ని విడుద‌ల చేయ‌నున్నార‌ట. ఇప్పుడే రిలీజ్ డేట్ అనౌన్స్ చేస్తే టూ ఎర్లీ అవుతుందేమో అని.. ట్రైల‌ర్ రిలీజ్ అయ్యాక విడుదల తేదీని ప్రకటించాలని మేకర్స్ ఆలోచిస్తున్నారట.

కాగా' 'నారప్ప' వెంకటేష్ కెరీర్ లో వస్తున్న 74వ సినిమా. ఇందులో ప్రియమణి ఫిమేల్ లీడ్ పోషిస్తుండగా.. కార్తీక్ రత్నం కీలక పాత్రలో నటిస్తున్నాడు. మెలోడీ బ్రహ్మ మణిశర్మ ఈ చిత్రానికి సంగీతం సమకూరుస్తున్నారు. శ్యామ్ కె నాయుడు సినిమాటోగ్రఫీ అందిస్తుండగా.. మార్తాండ్ కె.వెంకటేష్‌ ఎడిటింగ్ వర్క్ చేస్తున్నారు. గాంధీ నడికుడికర్‌ ఆర్ట్ డైరెక్టర్ గా వ్యవహరిస్తున్నారు. వి క్రియేషన్స్ మరియు సురేష్ ప్రొడక్షన్స్ పతాకాలపై క‌లైపులి ఎస్.థాను - సురేష్ బాబు కలసి ఈ చిత్రాన్ని నిర్మిస్తున్నారు.