ఆ క్రేజీ సీక్వెల్ ఎక్కడి దాకా వచ్చింది..??

కొన్నేళ్లపాటు టాలీవుడ్ లో స్టార్ డైరెక్టర్లలో ఒకరిగా వెలుగొందిన శ్రీను వైట్ల.. వరుస ప్లాప్స్ ఎదురవ్వడంతో చాలా గ్యాప్ తీసుకోవాల్సి వచ్చింది. 'అమర్ అక్బర్ ఆంటోనీ' తర్వాత దర్శకుడు మరో చిత్రాన్ని డైరెక్ట్ చేయలేదు. అయితే దాదాపు రెండేళ్ల క్రితమే మంచు విష్ణు హీరోగా ''డి అండ్‌ డి'' (డబుల్ డోస్) అనే చిత్రాన్ని ప్రకటించారు.

2007లో విష్ణు మరియు శ్రీను వైట్ల కాంబినేషన్ లో రూపొందిన బ్లాక్ బస్టర్ 'ఢీ' సినిమాకి సీక్వెల్ గా 'డి & డి' ప్రాజెక్ట్ ను లాంచ్ చేశారు. ఇందులో హీరోయిన్లుగా అను ఇమ్మాన్యుయేల్ - ప్రగ్యా జైశ్వాల్ లను తీసుకున్నారు. అవరమ్‌ భక్త మంచు సమర్పణలో 24 ఫ్రేమ్స్‌ ఫ్యాక్టరీ పతాకంపై ఈ చిత్రాన్ని నిర్మించనున్నట్లు తెలిపారు. పోస్టర్ కూడా వదిలారు.

అయితే అప్పుడెప్పుడో మొదలైన ఈ సినిమాకు సంబంధించి ఇటీవల కాలంలో మరో అప్డేట్ ఏదీ రాలేదు. మరోవైపు విష్ణు 'జిన్నా' అనే కొత్త ప్రాజెక్ట్ ని సెట్స్ మీదకు తీసుకెళ్లి, శరవేగంగా పూర్తి చేస్తున్నారు. ప్రమోషన్స్ కూడా మొదలు పెట్టేసారు. కానీ శ్రీను వైట్లతో చేస్తున్న సినిమా పరిస్థితి ఏంటనేది తెలియరాలేదు.

ఈ నేపథ్యంలో ''డి అండ్‌ డి'' మూవీ మధ్యలోనే ఆగిపోయిందనే రూమర్స్ వస్తున్నాయి. అదే సమయంలో యువ హీరో రామ్ పోతినేని తో శ్రీనువైట్ల ఒక సినిమా ప్లాన్ చేస్తున్నాడని.. 'రెడీ' కాంబోని సెట్ చేయడానికి ప్రయత్నాలు జరుగుతున్నాయని ఊహాగానాలు కూడా వినిపిస్తున్నాయి.

దీంతో 'డి అండ్‌ డి' అసలు ఉంటుందా లేదా అనే సందేహాలు కూడా వ్యక్తం అవుతున్నాయి. దీనికి తోడు శ్రీను వైట్ల వ్యక్తిగత జీవితంలో సమస్యలు వచ్చాయని.. అందుకే మంచు విష్ణు ప్రాజెక్ట్ ఆలస్యం అవుతూ వస్తోందని మరో పుకారు కూడా వస్తోంది. ఏదేమైనా ఎన్నో బ్లాక్ బస్టర్స్ ఇచ్చిన దర్శకుడు మళ్లీ సాలిడ్ కమ్ బ్యాక్ ఇవ్వాలని అభిమానులు కోరుకుంటున్నారు.

శ్రీను వైట్ల సైతం 'డి & డి' సినిమా మీద ధీమాగా ఉన్నారు. తన గత చిత్రాల శైలిలో హిలేరియస్ గా ఉంటుందని.. మీమర్స్ కు కావాల్సినంత స్టఫ్ దొరుకుతుందని హామీ ఇస్తున్నారు. మరో రెండు స్క్రిప్ట్స్ టైటిల్స్ తో సహా సిద్ధంగా ఉన్నాయని శ్రీను వైట్ల ఆ మధ్య ఓ ఇంటర్వ్యూలో తెలిపారు. మరి త్వరలో మూడిట్లో ఏదొక సినిమా ప్రేక్షకుల ముందుకు వస్తుందేమో చూడాలి.