ఈ ముగ్గురిలో చిరుకు బ్లాక్ బ‌స్ట‌ర్ ఇచ్చేది ఎవ‌రు?

క‌రోనా కార‌ణంగా మెగాస్టార్ నుంచి సినిమా వ‌చ్చి దాదాపు రెండేళ్ల‌కు పైమాటే అవుతోంది. ఈ నేప‌థ్యంలో చిరు నుంచి సినిమా అంటే అది గ్యారెంటీగా బ్లాక్ బ‌స్ట‌ర్ హిట్ అని మెగా ఫ్యాన్స్ అంతా భావించారు. కానీ ఆ అంచ‌నాల్ని త‌ల‌కిందులు చేస్తూ 'ఆచార్య‌' భారీ ఫ్లాప్ గా నిలిచి తీవ్ర నిరాశ‌కు గురిచేసింది. స్టార్ డైరెక్ట‌ర్ కొర‌టాల శివ భారీ స్థాయిలో తెర‌కెక్కించినా.. ఈ మూవీలో మెగా ప‌వ‌ర్ స్టార్ కీల‌క పాత్ర‌లో న‌టించినా ఈ మూవీని కాపాడ‌లేక‌పోయారు.

దీంతో మెగాస్టార్ చిరంజీవికి బ్లాక్ బ‌స్ట‌ర్ హిట్ ని ఇచ్చేది ఎవ‌రు? అనే ఆస‌క్తిక‌ర‌మైన చ‌ర్చ ఫ్యాన్స్ లో మొద‌లైంది. ప‌దేళ్ల విరామం త‌రువాత చిరంజీవి న‌టించిన చిత్రం 'ఖైదీ నంబ‌ర్ 150'. త‌మిళ బ్లాక్ బ‌స్ట‌ర్ 'క‌త్తి' ఆధారంగా రీమేక్ చేసిన ఈ మూవీతో బ్లాక్ బ‌స్ట‌ర్ హిట్ ని సొంతం చేసుకున్నారు. అయితే ఆ త‌రువాత సురేంద‌ర్ రెడ్డి డైరెక్ష‌న్ లో ప్ర‌తిష్టాత్మ‌కంగా చేసిన 'సైరా న‌రసింహారెడ్డి' భారీ స్థాయిలో రూపొందినా చిరుకు మాత్రం ఆశించిన ఫ‌లితాన్ని అందించ‌లేక‌పోయింది.

'ఆచార్య‌'తో అయినా ఆ స్థాయి హిట్ ని అందుకోవాల‌ని చేసిన ప్ర‌య‌త్నం కూడా వృథాకావ‌డంతో ఇప్ప‌డు అంద‌రి దృష్టి చిరుతో మూడు ప్రాజెక్ట్ లు చేస్తున్న దర్శ‌కుల‌పై ప‌డింది. 'ఆచార్య‌' త‌రువాత మెగాస్టార్ చిరంజీవి బ్యాక్ టు బ్యాక్ మూడు క్రేజీ చిత్రాల్లో నటిస్తున్నారు. ఇందులో రెండు రీమేక్ మూవీస్‌. ఒక‌టి స్ట్రెయిట్ ఫిల్మ్‌. మ‌ల‌యాళ సూప‌ర్ హిట్ ఫిల్మ్ 'లూసీఫ‌ర్‌' ఆధారంగా చిరు చేస్తున్న మూవీ 'గాడ్ ఫాద‌ర్'. ఈ చిత్రానికి మోహ‌న్ రాజా ద‌ర్శ‌కత్వం వ‌హిస్తున్నారు. చిత్రీక‌ర‌ణ చివ‌రి ద‌శ‌కు చేరుకున్నఈ మూవీలోని కీల‌క అతిథి పాత్ర‌లో బాలీవుడ్ స్టార్ హీరో సల్మాన్ ఖాన్ న‌టించారు.

న‌య‌న‌తార హీరోయిన్ గా క‌నిపించ‌నున్న ఈ మూవీపై భారీ అంచ‌నాలే వున్నాయి. మెహ‌ర్ ర‌మేష్ డైరెక్ష‌న్ లో త‌మిళ హిట్ ఫిల్మ్ 'వేదాలం' ఆధారంగా 'భోళా శంక‌ర్‌' చేస్తున్నారు. కీర్తి సురేష్ చెల్లెలు క్యారెక్ట‌ర్ లో న‌టిస్తోంది. త‌మ‌న్నా హీరోయిన్. మెహ‌ర్ ర‌మేష్ ట్రాక్ రికార్డ్ ని దృష్టిలో పెట్టుకుని ఈ మూవీ గురించి చ‌ర్చ జ‌రుగుతోంది. ఇప్ప‌టికే 40 శాతం చిత్రీక‌ర‌ణ పూర్తి చేసుకున్నఈ మూవీ నుంచి ఇటీవ‌ల విడుద‌ల చేసిన చిరంజీవి లుక్ సినిమాపై క్రేజ్ ని తీసుకొచ్చింది. దీంతో ఈ మూవీ కోసం కూడా ఫ్యాన్స్ ఆస‌క్తిగా ఎదురుచూస్తున్నారు.

ఇక బాబి డైరెక్ష‌న్ లో ఓ సినిమా చేస్తున్నారు మెగాస్టార్‌. వైజాగ్ షిప్ హార్బ‌ర్ నేప‌థ్యంలో సాగే యాక్ష‌న్ ఎంట‌ర్ టైన‌ర్ గా ఈ మూవీని ద‌ర్శ‌కుడు రూపొందిస్తున్నారు. కీల‌క అతిథి పాత్ర‌లో మాస్ మ‌హారాజా ర‌వితేజ న‌టిస్తుండ‌గా.. చిరుకు జోడీగా శృతిహాస‌న్ క‌నిపించ‌బోతోంది. ఈ నెల లోనే చిరుతో పాటు చిత్ర బృందం మ‌లేసియా వెళుతోంది. అక్క‌డే ప‌లు కీల‌క ఘ‌ట్టాల‌ని చిత్రీక‌రించి చిత్ర బృందం తిరిగి హైద‌రాబాద్ రాబోతోంది.

క్రేజీ కాంబినేష‌న్ లో రూపొందుతున్న ఈ మూవీ పై కూడా మంచి అంచ‌నాలే వున్నాయి. ఈ మూడు సినిమాల్లో ముందుగా 'గాడ్ ఫాద‌ర్‌' థియేట‌ర్ల‌లోకి రానుంది. ఈ నేప‌థ్యంలో ఈ ముగ్గురు ద‌ర్శ‌కుల్లో ఎవ‌రు మెగాస్టార్ కు బ్లాక్ బ‌స్ట‌ర్ హిట్ ని అందించ‌బోతున్నార‌న్న‌ది ఆస‌క్తిక‌రంగా మారింది.