ట్రైలర్ టాక్: వినపడేలా.. అంటున్న విజయ్

తమిళ స్టార్ హీరో విజయ్ నటించిన తాజా చిత్రం 'బిగిల్'. ఈ సినిమాను తెలుగులో 'విజిల్' అనే టైటిల్ తో రిలీజ్ చేస్తున్నారు. అట్లీ దర్శకత్వంలో తెరకెక్కిన ఈ సినిమాలో నయనతార హీరోయిన్ గా నటించింది. ప్రమోషన్స్ లో భాగంగా ఈ సినిమా ట్రైలర్ ను 'విజిల్' టీమ్ విడుదల చేసింది. ఈ సినిమాలో విజయ్ తండ్రికొడుకులుగా డబల్ రోల్ లో నటించినా మూడు విభిన్న పార్శ్వాలు ఉండే పాత్రలో నటించాడు. రాయప్పగా వయసుమళ్ళిన పాత్రలోనూ.. మైఖేల్/బిగిల్ గా మరో పాత్రలోనూ కనిపించాడు. మైఖేల్ ఒక రౌడీ కాగా.. బిగిల్ టాప్ క్లాస్ ఫుట్ బాల్ ప్లేయర్.

ఇక ట్రైలర్ విషయానికి వస్తే ట్రైలర్ ప్రారంభం నుంచే ఆడియన్స్ కు కనెక్ట్ అయ్యేలా ఉంది. గ్రౌండ్ లో ఫుట్ బాల్ టీమ్ కోచ్ బిగిల్ కు వుమన్ ప్లేయర్స్ అందరూ వరసగా గుడ్ మార్నింగ్ చెప్తుంటారు. ఒక అమ్మాయి మాత్రం ఏదో పరధ్యానంగా ఇంట్రెస్ట్ లేదు అన్నట్టుగా.. వినిపించకుండా 'గుడ్ మార్నింగ్ కోచ్' అంటుంది. ఒకరకమైన కేర్ లెస్ యాటిట్యూడ్ తో 'గట్టిగా' అంటాడు విజయ్. కొంచెం పెద్దగా 'గుడ్ మార్నింగ్ కోచ్' అంటుంది ఆ ప్లేయర్. మరోసారి 'గట్టిగా' అని రెట్టిస్తాడు. ఇంకొంచెం పెద్ద గొంతుకతో 'గుడ్ మార్నింగ్ కోచ్' అంటుంది. అయినా 'వినపడేలా' అంటాడు. ఈసారి స్టేడియం మొత్తం ప్రతిధ్వనించేలా 'గుడ్ మార్నింగ్ కోచ్' అంటుంది. మాస్ కు కిక్కిచ్చే ఇలాంటి సీన్స్ చాలానే ఉన్నాయి.

ఇక ట్రైలర్ లో విజయ్ యాటిట్యూడ్ గురించి స్పెషల్ గా చెప్పుకోవాలి. రాయప్ప పాత్రలో విజయ్ గోధుమ రంగు లుంగీని పైకి కట్టుకుంటూ నడిచే తీరు.. ఆ సమయంలోరెహమాన్ బ్యాక్ గ్రౌండ్ స్కోర్ సూపర్. ట్రైలర్ లో ఎక్కువగా ఇంప్రెస్ చేసే మరో అంశం ఫుట్ బాల్ ను నైపుణ్యంతో విజయ్ హ్యాండిల్ చేసే తీరు. ఓవరాల్ గా చూస్తే ఈ మాస్ మసాలా లాగా కనిపిస్తోంది. లాజిక్కులు అన్నీ వదిలేసి చూడాల్సిన మాస్ ఎంటర్టైనర్. విజయ్ సినిమా కాబట్టి రిచ్ ఫీల్ ఉంది. బ్యాక్ రౌండ్ స్కోర్.. సినిమాటోగ్రఫీ బాగున్నాయి. తమిళ నేటివిటీని కాసేపు పక్కన పెట్టి చూడగలిగితే మాత్రం ఎంజాయ్ చేసేలా ఉంది.