కేజీఎఫ్ డైరెక్ట‌ర్ - మైత్రి ఏ హీరోతో?

ఒకే ఒక్క సెన్సేష‌న్ తో అంద‌రివాడు అయ్యాడు ప్ర‌శాంత్ నీల్. కేజీఎఫ్ గ్రాండ్ స‌క్సెస్ తో ఇటు సౌత్ ఇండ‌స్ట్రీస్ లోనే కాదు అటు బాలీవుడ్ లోనూ అత‌డి పేరు మార్మోగిపోయింది. `ఇంద్ర‌నీల్` అన్న పేరే ఓ బ్రాండ్ లా మారింది. ఒక సాధా సీదా డ్రైవ‌ర్ కొడుకు హీరో అయినా కంటెంట్ తో కొడితే 350 కోట్లు గ‌ళ్లా పెట్టెలోకి రాల్తాయ‌ని ప్రూవ్ చేశాడు. అందుకే ప్ర‌శాంత్ నీల్ కావాలి! అంటూ ప‌లువురు అగ్ర నిర్మాత‌లు క‌ల‌వ‌రిస్తున్నారు. అత‌డు ఒకే అంటే చాలు! కోట్లు పెట్టేందుకు క్యూలో వెయిట్ చేస్తున్నారు. అయితే ప్ర‌స్తుతం ప్ర‌శాంత్ నీల్ దృష్టి మాత్రం కేవ‌లం కేజీఎప్ చాప్ట‌ర్ 2పైనే. ఈ సినిమాని ఇటీవ‌లే ప్రారంభించి శ‌ర‌వేగంగా పూర్తి చేస్తున్న సంగ‌తి తెలిసిందే.

కేజీఎఫ్ చాప్ట‌ర్ 1తో పోలిస్తే కేజీఎఫ్ చాప్ట‌ర్ 2లో భారీ యాక్ష‌న్ ఊపిరి స‌ల‌ప‌నివ్వ‌ద‌న్న ప్ర‌చారం సాగుతోంది. నేడు ప్ర‌శాంత్ నీల్ బ‌ర్త్ డే సంద‌ర్భంగా ప్ర‌పంచ‌వ్యాప్తంగా అభిమానులు శుభాకాంక్ష‌లు తెలిపారు. ప‌లు అగ్ర నిర్మాణ సంస్థ‌లు ప్ర‌త్యేకించి అత‌డికి సోష‌ల్ మీడియాలో విషెస్ తెలియ‌జేశాయి. అదంతా స‌రే.. ప్ర‌శాంత్ నీల్ ద‌ర్శ‌క‌త్వంలో సినిమా తీసేందుకు దిల్ రాజు.. అల్లు అర‌వింద్.. యువి అధినేత‌లు అంత‌టివారే స‌న్నాహకాల్లో ఉన్నార‌ని ప్ర‌చార‌మైంది. ఆ క్ర‌మంలోనే మైత్రి మూవీ మేక‌ర్స్ పేరు ప్ర‌ముఖంగా వినిపించింది. మునుముందు టాలీవుడ్ లో ప‌లు అగ్ర నిర్మాణ సంస్థ‌ల‌తో టై అప్ అయ్యి ప్ర‌శాంత్ నీల్ సినిమాలు తీసే అవ‌కాశం ఉంద‌ని తెలుస్తోంది.

ఇప్ప‌టికి మైత్రి సంస్థ కాస్తంత అడ్వాన్స్ డ్ గానే ఉంది. నేడు అత‌డి పుట్టిన‌రోజు సంద‌ర్భంగా ``హ్యాపి బ‌ర్త్ డే టు అవ‌ర్ సెన్సేష‌న‌ల్ డైరెక్ట‌ర్`` అంటూ మైత్రి సంస్థ ప్ర‌త్యేకించి ప్ర‌స్థావించ‌డంతో కేజీఎఫ్ 2 త‌ర్వాత ఈ బ్యాన‌ర్ లోనే సినిమా ఉంటుందా? అంటూ ఆస‌క్తిక‌ర డిబేట్ సాగుతోంది. ఇక రామ్ చ‌ర‌ణ్.. మ‌హేష్.. ప్ర‌భాస్.. ఎన్టీఆర్ .. అభిమానులంతా మా వాడితో సినిమా చెయ్యాలంటూ సోష‌ల్ మీడియాలో ఎవ‌రికి వారు వైర‌ల్ గా కోరుతున్నారు. బ‌ర్త్ డే శుభాకాంక్ష‌లు చెప్పిన మైత్రి సంస్థ‌కు ప్ర‌శాంత్ తొలి అవ‌కాశం ఇస్తే.. ఏ హీరోతో చేస్తారు? అన్న ఆస‌క్తిక‌ర డిబేట్ అభిమానుల్లో సాగుతోంది.