అల్లుడి పండుగకు ఏ మామ రాబోతున్నాడు?

మెగా బ్రదర్స్‌ మేనల్లుడు సాయి ధరమ్‌ తేజ్‌ హీరోగా మారుతి దర్శకత్వంలో రూపొందిన 'ప్రతి రోజు పండుగే' చిత్రం విడుదలకు సిద్దం అయ్యింది. వచ్చే వారంలో ప్రేక్షకుల ముందుకు రాబోతున్న ఈ చిత్రం ప్రీ రిలీజ్‌ వేడుకను ఈనెల 15న నిర్వహించేందుకు ఏర్పాట్లు జరుగుతున్నాయి. హైదరాబాద్‌ లోని ఐటీసీ కోహినూర్‌.. మాదాపూర్‌ నందు ఈ ప్రీ రిలీజ్‌ వేడుకను నిర్వహించబోతున్నట్లుగా చిత్ర యూనిట్‌ సభ్యులు అధికారికంగా ప్రకటించారు.

ఈ మెగా వేడుకలో పాల్గొనబోతున్న చీప్‌ గెస్ట్‌ ఎవరు అనే విషయమై యూనిట్‌ సభ్యులు ఇంకా రివీల్‌ చేయలేదు. కాని సినీ వర్గాల ద్వారా అందుతున్న విశ్వసనీయ సమాచారం ప్రకారం చిరంజీవి లేదా పవన్‌ కళ్యాణ్‌ లలో ఎవరినో ఒకరిని ఈ వేడుకకు తీసుకు వచ్చేందుకు చిత్ర యూనిట్‌ సభ్యులు తీవ్రంగా ప్రయత్నాలు చేస్తున్నారట. పవన్‌ కళ్యాణ్‌ రాజకీయంగా చాలా బిజీగా ఉన్నాడు. ఈ క్రమంలో ఆయన హాజరు అయ్యేది లేనిది క్లారిటీ లేదు. చిరంజీవితో కూడా చిత్ర యూనిట్‌ సభ్యులు చర్చలు జరిపినట్లుగా సమాచారం అందుతోంది. వీరిద్దరిలో ఎవరో ఒకరు ప్రీ రిలీజ్‌ వేడుకలో హాజరయ్యే అవకాశాలున్నాయంటూ చిత్ర యూనిట్‌ సభ్యులు అనధికారికంగా చెబుతున్నారు.

చిత్రలహరి చిత్రం తర్వాత మళ్లీ సక్సెస్‌ ట్రాక్‌ ఎక్కిన సాయి ధరమ్‌ తేజ్‌ ఈ చిత్రంతో మళ్లీ తన సక్సెస్‌ జర్నీని కంటిన్యూ చేస్తాడేమో చూడాలి. మారుతి ఈ చిత్రంను ఫ్యామిలీ ఎంటర్‌ టైనర్‌ గా రూపొందించాడు. రాశిఖన్నా హీరోయిన్‌ గా ఈ చిత్రంలో కనిపించబోతుంది. ఇప్పటికే విడుదలైన టీజర్‌ మరియు ట్రైలర్‌ సినిమాపై అంచనాలు అమాంతం పెంచాయి. మరి సినిమా ఎలా ఉంటుందో చూడాలి.