ఇస్మార్ట్‌ శంకర్‌ తో మహర్షి మీటింగ్‌ ఏంటో?

రామ్‌ మరియు పూరి జగన్నాధ్‌ లు చాలా కాలం తర్వాత ఇస్మార్ట్‌ శంకర్‌ తో మంచి సక్సెస్‌ ను దక్కించుకున్నారు. వీరిద్దరి కెరీర్‌ లో ఈ విజయం చాలా కీలకమైనదిగా చెప్పుకోవాలి. సినిమా ప్రమోషన్స్‌ లో మొన్నటి వరకు కనిపించని రామ్‌ విదేశాల నుండి తిరిగి వచ్చాక ఫుల్‌ స్వింగ్‌ లో ప్రమోషన్‌ కార్యక్రమాల్లో పాల్గొంటున్నాడు. మూడవ వారంలో కూడా మంచి షేర్‌ ను రాబడుతున్న నేపథ్యంలో రామ్‌ మీడియా సమావేశాలు.. ప్రత్యేక ఇంటర్వ్యూలు ఇంకా బిగ్‌ బాస్‌ ప్రమోషన్స్‌ కూడా చేశాడు.

తాజాగా ప్రెస్‌ మీట్‌ నిర్వహించిన ఇస్మార్ట్‌ శంకర్‌ అదే సమయంలో సూపర్‌ స్టార్‌ మహేష్‌ బాబుతో కలవడం చర్చనీయాంశం అవుతుంది. మీడియా సమావేశంకు ముందు లేదంటే ఆ తర్వాత మహేష్‌ తో రామ్‌ కలిశాడు. వీరిద్దరి కలయిక కాస్త ఆశ్చర్యంగా ఉంది. గత కొన్ని రోజులుగా మహేష్‌ బాబు ఫ్యాన్స్‌ చాలా సీరియస్‌ గా పూరిపై ట్రోల్స్‌ చేస్తున్నారు. మహేష్‌ నన్ను సక్సెస్‌ ఉంటేనే పట్టించుకుంటాడు అంటూ పూరి చేసిన వ్యాఖ్యలు దుమారం రేపుతున్నాయి.

ఇలాంటి సమయంలో వీరిద్దరి కలయిక కారణం ఏమై ఉంటుందా అంటున్నారు. పూరి మరియు మహేష్‌ మద్య ఏర్పడిన గ్యాప్‌ ను రామ్‌ ఏమైనా దూరం చేసే ప్రయత్నం చేశాడా అనే టాక్‌ కూడా వస్తుంది. సరిలేరు నీకెవ్వరు చిత్రంతో బిజీగా ఉన్నా కూడా మహేష్‌ బాబు టైం కేటాయించి రామ్‌ తో మాట్లాడటం అంటే ఏదో పెద్ద విషయమే అయ్యి ఉంటుందనే అనుమానాలు కూడా వ్యక్తం అవుతున్నాయి. మొత్తానికి ఇస్మార్ట్‌ శంకర్‌ తో మహేష్‌ చర్చలపై సోషల్‌ మీడియాలో పెద్ద చర్చే జరుగుతోంది.