శ్రీదేవిని వెంటాడి వేటాడుతున్న శివ‌గామి

అతిలోక సుంద‌రికి ఎప్పుడూ ఎదురుకాని చిత్ర‌మైన ప‌రిస్థితి ఎదుర‌వుతోంది. భార‌తీయ సినిమాను మ‌రో స్థాయికి తీసుకెళ్లిన బాహుబ‌లిలో ఆమెకు శివ‌గామి పాత్ర కోసం అడ‌గ‌టం.. గొంతెమ్మ కోర్కెల‌తో పాటు.. భారీ రెమ్యున‌రేష‌న్‌.. వాటా అడ‌గ‌టంతో ఆమె స్థానంలో రమ్య‌కృష్ణ‌ను తీసుకోవ‌టం తెలిసిందే.

ఈ సినిమాలో శివ‌గామి లాంటి ప‌వ‌ర్ ఫుల్ క్యారెక్ట‌ర్‌ ను అత్యాశ‌తోనే శ్రీదేవి మిస్ చేసుకుంద‌న్న విష‌యాన్ని ద‌ర్శ‌కుడు రాజ‌మౌళి చెప్ప‌క‌నే చెప్పేయ‌ట‌మే కాదు.. ఆమె నో చెప్ప‌టం త‌మకు లాభ‌మైంద‌న్న మాట కూడా జ‌క్క‌న్న నోటి నుంచి ఆ మ‌ధ్య రావ‌టం తెలిసిందే.

ఒక ప్ర‌ముఖ న‌టి గురించి ఈ త‌ర‌హా వ్యాఖ్య‌లు సూటిగా చేయ‌టం చాలా అరుదుగా జ‌రిగేది. అలాంటిది వివాదాల‌కు దూరంగా ఉండే జ‌క్క‌న్న‌.. ఎలాంటి మొహ‌మాటం లేకుండా జ‌రిగిన విష‌యాన్ని చెప్పేయ‌టంతో డ‌బ్బు విష‌యంలో ఆమె మ‌రీ ఇంత గ‌ట్టిగా ఉంటారా? అన్న క్వ‌శ్చ‌న్ మొద‌లైంది.

జ‌క్క‌న్న మాట‌లు మీడియాలో బ‌లంగా వెళ్లిపోవ‌టంతో.. ఇప్పుడు శ్రీదేవి ఎక్క‌డ‌కు వెళ్లినా.. శివ‌గామి పాత్ర‌కు ఎందుకు నో చెప్పారన్న ప్ర‌శ్న‌ను మీడియా వేయ‌టం ఆమెకు ఇబ్బందిక‌రంగా మారింది. తాజాగా ఆమె న‌టించిన మామ్ చిత్ర ప్ర‌మోష‌న్‌ ను షురూ చేశారు. ఈ ప్ర‌చారంలో భాగంగా ఆమె ఎక్క‌డ‌కు వెళ్లినా.. శివ‌గామిని పాత్ర‌ను ఎందుకు వ‌ద్ద‌న్నారంటూ అడుగుతున్న ప్ర‌శ్న‌ల‌కు ఆమె స‌మాధానం చెప్ప‌లేక‌పోతున్నార‌ట‌. తాజాగా ఇలాంటి ప్ర‌శ్న‌ల‌కు శ్రీదేవి ఇచ్చిన స‌మాధానం ఏమిటో తెలుసా?

శివ‌గామి పాత్ర‌ను ఎందుకు వ‌దులుకున్నార‌న్న ప్ర‌శ్న‌కు స‌మాధానం చెప్పేందుకు ఇష్ట‌ప‌డ‌ని శ్రీదేవి.. తాను స‌మ‌యం వ‌చ్చిన‌ప్పుడు ఆ ప్ర‌శ్న‌కు సమాధానం చెబుతాన‌నటం గ‌మ‌నార్హం. అంతేనా.. ప్ర‌స్తుతానికి మాత్రం నో కామెంట్ అంటూ ముక్తాయిస్తున్నారు. రానున్న రోజుల్లో మ‌రిన్ని ప్రాంతాల్లో ప‌ర్య‌టించ‌నున్న శ్రీదేవిని.. శివ‌గామి పాత్ర‌ను ఎందుకు వ‌దిలేశార‌న్న ప్ర‌శ్న వెంటాడి వేటాడుతున్న‌ట్లుగా చెబుతున్నారు. మొత్తానికి శ్రీదేవికి శివ‌గామి ఫోబియోగా మారుతుందేమో?

Like Us on Facebook : https://www.facebook.com/Tupakidotcom/