అక్కినేని 'లవర్ బాయ్' పోలీస్ అధికారిగా చేయనున్నాడా??

టాలీవుడ్ ఇండస్ట్రీలో మొన్నటివరకు లవర్ బాయ్ పాత్రలలో మెప్పించిన హీరో అక్కినేని నాగచైతన్య. ఈ మద్యే డిఫరెంట్ స్టోరీలతో, డిఫరెంట్ పాత్రలున్న సినిమాలను ఎంచుకుంటున్నాడు. సవ్యసాచి ముందువరకు లవర్ బాయ్ గా కనిపించిన చైతు.. మజిలీ సినిమాతో ట్రెండ్ మార్చాడు. మజిలీ సినిమాలో మంచి నటనను ప్రదర్శించాడనే చెప్పాలి. అయితే ప్రస్తుతం ఇండస్ట్రీలో ఉన్న అక్కినేని హీరోలలో నాగచైతన్య ఒక్కడే సక్సెస్ ఫుల్ గా రన్ అవుతున్నాడు. ఇప్పటినుండి సినిమా సినిమాకి రూట్ మార్చి అలరించేలా ఉన్నట్లు మూవీ సెలక్షన్ చూస్తే అర్ధమవుతుంది. మజిలీ తర్వాత నాగచైతన్య నుండి ఎలాంటి సినిమా రాలేదు. దాదాపు ఏడాదిన్నర తరువాత శేఖర్ కమ్ముల డైరెక్షన్ లో నటించిన లవ్ స్టోరీ మూవీ ప్రేక్షకుల ముందుకు రాబోతుంది.

ఇప్పటికే లవ్ స్టోరీ మూవీ సోషల్ మీడియా, ఇండస్ట్రీలో మంచి బజ్ క్రియేట్ చేసింది. అయితే లవ్ స్టోరీ మూవీ లైన్ లో ఉండగానే నాగచైతన్య.. మనం ఫేమ్ విక్రమ్ కే కుమార్ తో థాంక్యూ సినిమా ఓకే చేసిన సంగతి తెలిసిందే. ఆ సినిమా త్వరలోనే సెట్స్ పైకి వెళ్లనుండగా.. మరో క్రేజీ సినిమాకు ఓకే చెప్పినట్లు తెలుస్తుంది. నాగచైతన్య ‘పెళ్లిచూపులు’ ఫేమ్ తరుణ్‌ భాస్కర్‌ దర్శకత్వంలో ఓ సినిమా చేయనున్నట్లు సమాచారం. తాజా కథనాల ప్రకారం.. ఇదివరకు డైరెక్టర్‌ తరుణ్‌ భాస్కర్‌ చైతూకి ఓ కథ వినిపించాడట. అందులో హీరో పవర్‌ఫుల్‌ పోలీస్‌ ఆఫీసర్‌ అని టాక్. ఇక వినగానే కథ నచ్చడంతో చైతూ వెంటనే ఓకే చెప్పినట్లు సినీవర్గాలలో చర్చ మొదలైంది. అయితే ఈ వార్తకు సంబంధించి ఇప్పటివరకూ ఎలాంటి అధికారిక ప్రకటన బయటికి రాలేదు. అయితే నాగచైతన్య పోలీస్‌ ఆఫీసర్‌ పాత్రలో అనేసరికి అభిమానుల్లో ఆసక్తి పెరిగింది. చూడాలి మరి ఈ విషయంపై హీరో డైరెక్టర్ ఎలా స్పందిస్తారో!