క్రికెట్ బ్యాట్లతో నాని చైతుల ఫైట్

ఈ ఏడాది ఇప్పటిదాకా యునానిమస్ గా బ్లాక్ బస్టర్ అనిపించుకున్న ఇండస్ట్రీ హిట్ ఎఫ్2 ఒక్కటే. గత ఐదారు వారాలుగా యాత్ర మినహాయించి ప్రేక్షకులకు బాగా రిజిస్టర్ అయిన సినిమా మరొకటి లేదు. నిన్న ఎన్టీఆర్ మహానాయకుడు సైతం నిరాశ పరచడంతో బయ్యర్లు ఏదైనా క్రేజీ మూవీ రాకపోతుందా అని ఎదురు చూస్తున్నారు. అయితే దానికి ఇంకో నెలకు పైగా టైం పట్టేలా ఉంది. ఏప్రిల్ 5 తో మళ్ళి జాతర మొదలు కాబోతోంది.

నాగ చైతన్య-సమంతా జంటగా మనం తర్వాత కలిసి నటించిన మజిలి అదే డేట్ ఫిక్స్ చేసుకుంది. మరో వైపు మొదటిసారి క్రికెటర్ పాత్రలో నాని చేస్తున్న జెర్సీ కూడా ఏప్రిల్ 5నే లాక్ చేసుకుంది. సో క్లాష్ కావడం తప్పదని తేలిపోయింది. ఇప్పటికైతే ప్రకటించారు కాని ఇంకా ఆ తేదికి నెలకు పైగా టైం ఉన్న నేపధ్యంలో ఏమైనా మార్పు ఉండే అవకాశాన్ని కొట్టి పారేయలేం. సో క్లాష్ కావడంలో విశేషం లేదు కాని ఒక సారుప్యత అభిమానుల్లో ఆసక్తి పెంచుతోంది

రెండు సినిమాల్లో అటు నాని ఇటు చైతు ఇద్దరూ క్రికెటర్లుగా నటిస్తున్నారు. మజిలిలో భార్యభర్తల కోణం ఉంటుంది. జెర్సీలో స్పోర్ట్స్ బ్యాక్ డ్రాప్ డామినేట్ చేస్తుంది. ఎమోషన్స్ రెండింటిలో ఉంటాయి. మరో విశేషం ఏంటంటే రెండు సినిమాల దర్శకులకు ఇది రెండో సినిమా. గౌతం తిన్ననూరి మళ్ళి రావా తర్వాత చేస్తున్న మూవీ జెర్సీ కాగా మజిలి దర్శకుడు శివ నిర్వాణకు నిన్ను కోరి తర్వాత ఇది రెండో మూవీ. ఇద్దరూ తమ డెబ్యు మూవీస్ లో సెన్సిటివ్ లవ్ స్టోరీస్ నే ఎంచుకున్నారు. ఈ రకంగా కూడా ఈ క్లాష్ ఆసక్తి రేపుతోంది. నాని చైతులు ఇలా ఒకేరోజు తలపడటం ఇదే మొదటి సారి.