నెం.1 హీరోను లక్ష్మి ముంచింది దుర్గామతి అయినా తేల్చేనా?

బాలీవుడ్ లో నెం.1 హీరో ఎవరు అంటే ఠక్కున వచ్చే ఆన్సర్‌ అక్షయ్‌ కుమార్‌. ఇది ప్రేక్షకులు మాత్రమే కాకుండా ఫోర్బ్స్‌ వారు కూడా చెబుతున్న విషయం. గత మూడు నాలుగు సంవత్సరాలుగా అక్షయ్‌ కుమార్‌ ఆదాయం అమాంతం పెరిగి పోయింది. అతడి సక్సెస్‌ రేటు కూడా అలా అలా పైకి వెళ్లింది. ఏడాదిలో మూడు నాలుగు సినిమాలను మినిమం విడుదల చేస్తూ ప్రతి సినిమాకు 150 నుండి 250 కోట్ల రూపాయల వరకు వసూళ్లు సాధిస్తున్న ఈ నెం.1 హీరో సౌత్‌ సూపర్‌ హిట్‌ మూవీ కాంచనను రీమేక్‌ చేశాడు.

కాంచన రీమేక్‌ 'లక్ష్మి' ఇటీవలే ప్రేక్షకుల ముందుకు వచ్చింది. ఆ సినిమా తీవ్రంగా నిరాశ పర్చింది. థియేటర్లలో విడుదల అయ్యి ఉంటే ఫలితం ఎలా ఉండేది అనే విషయం పక్కన పెడితే చాలా కాలం తర్వాత అక్షయ్‌ కి డిజాస్టర్‌ పడింది. లక్ష్మి తర్వాత మరో సౌత్ సినిమా భాగమతిని అక్షయ్‌ రీమేక్‌ చేశాడు. అయితే ఈ సినిమాకు అక్షయ్‌ నిర్మాతగా వ్యవహరించాడు. భూమి ఫడ్నేకర్‌ హీరోయిన్‌ గా నటించిన ఈ సినిమా కూడా డైరెక్ట్‌ ఓటీటీ ద్వారా ప్రేక్షకుల ముందుకు రాబోతుంది. అక్షయ్‌ కి ఓటీటీ అచ్చి రాలేదు అనుకుంటున్న సమయంలో ఈ సినిమాతో రాబోతున్నాడు.

అనుష్క హీరోయిన్‌ గా నటించిన భాగమతి సినిమా తెలుగులో ఆశించిన స్తాయిలో సక్సెస్‌ కాలేదు. కాని కలెక్షన్స్‌ విషయంలో మాత్రం సక్సెస్‌ అని చెప్పుకోవచ్చు. భాగమతి సినిమా రీమేక్‌ అవ్వడం వల్ల దుర్గామతి పై అంచనాలు భారీగా ఉన్నాయి. మరి ఓటీటీ లో విడుదల కాబోతున్న ఈ సినిమా ఎలాంటి ఫలితం దక్కించుకుంటుంది అనేది చూడాలి. దుర్గామతి నిర్మాతగా అక్షయ్‌ కుమార్‌ కు ఎలాంటి ఫలితంను ఇస్తుందో చూడాలి.