యువ హీరోకి ఈసారైనా లక్ కలిసొచ్చేనా..?

కెరీర్ ప్రారంభంలో సపోర్టింగ్ రోల్స్ లో అలరించిన వర్సటైల్ యాక్టర్ శర్వానంద్.. తర్వాతి రోజుల్లో హీరోగా మారి ప్రేక్షకులను మెప్పిస్తూ వస్తున్నారు. విభిన్నమైన కథలు విలక్షణమైన పాత్రలు ఎంచుకుంటూ తనకంటూ ప్రత్యేకమైన గుర్తింపు తెచ్చుకున్నారు. అయితే గత కొన్నాళ్లుగా శర్వాకు ఏదీ కలిసి రావడం లేదు. చేసిన సినిమాలన్నీ బాక్సాఫీస్ వద్ద ఆశించిన స్థాయిలో ప్రభావం చూపలేకపోతున్నాయి.

నాలుగేళ్ళ క్రితం ‘మహానుభావుడు’ సినిమాతో మంచి సక్సెస్ అందుకున్న శర్వానంద్.. అప్పటి నుంచి ఆ రేంజ్ హిట్టు అందుకోలేకపోయారు. ‘పడి పడి లేచే మనసు’ ‘రణరంగం’ ‘జాను’ వంటి హ్యాట్రిక్ పరాజయాలు చవిచూసిన శర్వా.. ఈ ఏడాది ‘శ్రీకారం’ ‘మహాసముద్రం’ వంటి మరో రెండు ఫ్లాపులను తన ఖాతాలో వేసుకున్నారు. కెరీర్ సాఫీగా సాగిపోతున్న సమయంలో ఇలా లైన్ గా ఐదు ఫ్లాపులు పలకరించడం యువ హీరో మార్కెట్ ని బాగా దెబ్బతీసిందనే చెప్పాలి.

నిజానికి శర్వానంద్ నటించిన గత ఐదు సినిమాలు కూడా వేటికవే ప్రత్యేకమైనవే. హీరో తన పాత్ర వరకు న్యాయం చేసినా ప్రేక్షకులను ఆ సినిమాలు అలరించలేకపోయాయి. 'శ్రీకారం' వంటి సందేశాత్మక చిత్రాన్ని.. భారీ హైప్ తో వచ్చిన 'మహాసముద్రం' సినిమాని కూడా రిజెక్ట్ చేశారు. దీంతో ఇప్పుడు శర్వా కు అర్జెంట్ గా ఓ హిట్ అవసరం ఎంతైనా ఉంది. ఈ నేపథ్యంలో యువ హీరో ఆశలన్నీ ‘ఆడవాళ్లు మీకు జోహార్లు’ సినిమాపైనే ఉన్నాయి.

పక్కింటి కుర్రాడిలా కనిపించే శర్వానంద్ ను ఫ్యామిలీ ఎంటర్టైనర్లలో చూడడానికి ప్రేక్షకులు ఇష్టపడతారు. అయితే 'శతమానం భవతి' తర్వాత ఆ జోనర్ లో మరో సినిమా చేయలేదు. అందుకే ఈసారి కుటుంబ ప్రేక్షకులను టార్గెట్ చేస్తూ ''ఆడవాళ్లు మీకు జోహార్లు'' సినిమాతో వస్తున్నాడు శర్వా. ‘నేను శైలజ’ ‘చిత్రలహరి’ వంటి సూపర్ హిట్స్ అందుకున్న కిషోర్ తిరుమల ఈ చిత్రానికి దర్శకుడు. ఇందులో శర్వా సరసన లక్కీ బ్యూటీ రష్మిక మందన్న హీరోయిన్ గా నటిస్తోంది. వీరి ముగ్గురి కలయికలో వస్తోన్న తొలి సినిమా ఇది.

'ఆడవాళ్లు మీకు జోహార్లు' అనే టైటిల్ ను బట్టే ఇది మహిళా ప్రాధాన్యత ఉన్న సినిమా అని అర్థం అవుతోంది. దీనికి తగ్గట్టుగానే ఖుష్బూ - రాధికా శరత్‌ కుమార్ - ఊర్వశి వంటి ముగ్గురు ఎవర్‌ గ్రీన్ నటీమణులను కీలక పాత్రల్లో నటింపజేస్తున్నారు. శర్వానంద్ కు ఫ్యామిలీ మరియు లేడీ ఫ్యాన్ ఫాలోయింగ్ ఎక్కువ అనే సంగతి తెలిసిందే. అందులోనూ ఈసారి రష్మిక కూడా జత చేరింది.

'ఛలో' సినిమాతో ఇండస్ట్రీలో అడుగుపెట్టిన రష్మిక మందన్నా.. టాలీవుడ్ లో లక్కీ బ్యూటీగా పిలవబడుతోంది. ప్రస్తుతం పాన్ ఇండియా చిత్రాలతో పాటుగా హిందీ సినిమాలు చేస్తూ క్రేజీ హీరోయిన్ గా మారిపోయింది రష్మిక. ఆమె క్రేజ్ మరియు లక్ ఇప్పుడు శర్వా కు హెల్ప్ అయ్యే అవకాశం ఉంది.

'ఆడవాళ్లు మీకు జోహార్లు' తో పాటుగా 'ఒకే ఒక జీవితం' అనే తెలుగు తమిళ ద్విభాషా చిత్రంలో నటిస్తున్నాడు శర్వా. అప్పుడెప్పుడో షూటింగ్ కంప్లీట్ చేసుకున్న ఈ సినిమా విడుదలకు సిద్ధం అవుతోంది. శర్వా కెరీర్ మళ్ళీ గాడిలో పడాలంటే ఈ రెండు సినిమాలు సక్సెస్ అవ్వాల్సి ఉంటుంది. రాబోయే రోజుల్లో ఏమి జరుగుతుందో చూడాలి.