‘మహర్షి’ ఏమైనా పనికొస్తుందా?

అప్పుడెప్పుడో ‘గమ్యం’ సినిమాలో ఒక స్పెషల్ క్యారెక్టర్ చేశాడు అల్లరి నరేష్. అప్పుడతను హీరోగా పీక్స్‌ లో ఉండేవాడు. ‘గమ్యం’లో గాలి శీను పాత్ర అతడికి మంచి పేరు తెచ్చి పెట్టి కెరీర్‌ కు అన్ని రకాలుగా ఉపయోగపడింది. ఐతే మళ్లీ క్యారెక్టర్ రోల్స్ కొన్ని ఆఫర్ చేసినా నరేష్ చేయలేదు. కానీ ఇప్పుడు హీరోగా తన కెరీర్ చాలా ప్రమాదంలో ఉన్న సమయంలో ‘మహర్షి’ లాంటి భారీ చిత్రంలో మహేష్ బాబుకు స్నేహితుడిగా నటించే అవకాశం లభించింది. మరో ఆలోచన లేకుండా ఈ సినిమా ఒప్పేసుకున్నాడు నరేష్. సినిమాలో అతడి పాత్ర మరీ ప్రత్యేకం అని చెప్పలేం. అలాగని తీసిపడేయలేం. నరేష్ ఉన్నంతలో చక్కటి పెర్ఫామెన్స్‌ తో మెప్పించాడు. సినిమా ఓ మోస్తరు విజయాన్నందుకునేలా ఉండటంతో నరేష్ హ్యాపీనే. కానీ ఈ సినిమా తర్వాత నరేష్ పొజిషనేంటి? దీని వల్ల నరేష్‌ కు ఏం లాభం జరుగుతుంది? అన్నది ఇప్పుడు చర్చనీయాంశమైంది.

‘మహర్షి’ తర్వాత వరుసగా క్యారెక్టర్ రోల్స్ వస్తే నరేష్ చేస్తాడా లేదా అన్నది ప్రశ్నార్థకం. అలా ఒప్పుకుంటూ పోతే హీరోగా కంటిన్యూ కావడం కష్టం. హీరోలుగా నటించిన వాళ్లు క్యారెక్టర్ రోల్స్ చేయడం కొత్తేమీ కాదు. కానీ వయసు మళ్లాక, హీరోగా మార్కెట్ పూర్తిగా దెబ్బ తిన్నాక ఆ పాత్రల వైపు వెళ్తుంటారు. జగపతిబాబు, శ్రీకాంత్, రాజేంద్రప్రసాద్ ఇలా చాలామంది ఈ కోవలోని వాళ్లే. కానీ హీరోలుగా వాళ్లు నరేష్‌ తో పోలిస్తే లాంగ్ కెరీర్ చూశారు. కాబట్టి ఒకప్పుడు హీరోగా ఒక వెలుగు వెలిగి.. ఇంత తక్కువ వయసులోనే క్యారెక్టర్ రోల్స్‌ కు పరిమితం కావడం అంటే కష్టమే. మరి మహర్షి వల్ల వచ్చిన పేరుతో హీరోగా నరేష్ కెరీర్‌ కు ఏమైనా కలిసొస్తుందా అన్నది చూడాలి. మళ్లీ జనాల దృష్టిలో పడ్డ నరేష్.. తాను హీరోగా నటిస్తున్న చిత్రాలకు వాళ్లను థియేటర్లకు రప్పించగలడా అన్నది కీలకంగా మారింది. అతను హీరోగా ఒకటికి రెండు సినిమాలు సెట్స్ మీద ఉన్నాయి. అందులో ‘బంగారు బుల్లోడు’ ముందుగా ప్రేక్షకుల ముందుకు రానుంది. ఆ సినిమా రిలీజైతే కానీ.. నరేష్ భవిష్యత్తుపై ఓ అంచనాకు రాలేం.